Могойтын шахан таргалуулгын совхоздо анхан хүдэлһэн Балданай Норбосамбу, Бадмын Балбар, Эрдыниин Сэрэнжаб, Дэлэгэй Дашидондок ба бэшэн Yрөөнэйн шэлын ара талада адуу мала атар тарганаар харууһалжа, аймаг, тойрог дотороо ехэ үрэ дүн туйлаһан түрүү малшад байһан юм.
Совет үедэ хамтын мал олошоруулжа, ажалай амжалта туйлаhан хонишон Бадмын Балбар Ажалай Улаан Тугай орденоор шагнагдаһан намтартай. Бэшэшье олон малшад гүрэн түрын шан хайрануудта хүртэһэн ааб даа. Мүнөө наһанай амаралтада гарахаяа байһан, малша угай Дашидондогой Баир хамтын мяхалиг үхэр һүрэг шадабаритайгаар хаража, урданай ажалай оньhые хүбүүндээ дамжуулжа шадаhан Дэлэгэй Дашидондок эсэгынгээ хэрэг hайнаар үргэлжэлүүлэн, нютагтаа хүндэтэй болоhоор үнинэй юм. Мүнөө Могойтын үүлтэртэ ажахыда 2000 гаран толгой казах малаан ба герефорд үүлтэрэй эбэртэ бодо мал үсхэбэрилэгдэдэг байна.
Ага станциһаа урагшаа зорижо гараад ябахада, Yдэ-Булаг гэжэ газарта малшанай дангигар бууса тобойн харагдадаг. Тэндэ сагаангууд угай Бутидэй Галсан олон жэлэй туршада буусаяа түхеэржэ, хамтын ажахыда хонишоноор, үхэршэнөөр хүдэлжэ, наһанайнгаа амаралтада гараһан байна. Талын малша аха нүхэр эрхим ажалаараа Агын тойрогто мэдээжэ боложо, 1990 ондо «Россиин Федерациин хүдөө ажахын габьяата хүдэлмэрилэгшэ» гэһэн үндэр нэрэ зэргэдэ хүртэһэн. Гүрэн түрын иимэ шан абаhан хүнэй хуби заяан, намтар хаанаhаа эхитэйб гэхэдэ, Шандан Бооржо нютагһаа гарбалтай Хандын Бутид эжыгээ дахажа, Галсан хүбүүн балшар бага наһанһаа мал ажалда дуратай, дүршэлтэй болоhон. Эхэ хүбүүн хоёр элдин hайхан түрэл нютагhаа гаража, түрүүн Зугаалай нютаг зөөжэ ерээд, һүүлээрнь Ага станциин хажууда эмхидхэгдэһэн хамтын ажахыда табан хушуун мал үдхэлсэhэн. Хамтаралай үедэ ажалайнгаа намтар эхилhэн, түрүүшын колхоз байгуулагшадай нэгэн Хандын Бутид «Эсэгын дайнай үедэ габшагай ажалай түлөө» ба бэшэшье олон медальнуудаар шагнагдаhан. Тэдэнэр нютагайнгаа үүлтэртэ ажахын хүгжэлтэдэ нилээд ехэ хубитаяа оруулhан зон болоно. Галсан аха түрэл нютагаараа, ажалша зоноороо, малша угаараа омогорхожо ябадаг.
Зугаалайн дасанай газаа Сагаан Дара эхын ордоной рамнайн маани мэгзэмэй абяан доро шүтөөнэй газар гороолжо ябаhан, хүнгэн алхасатай, дорюун зантай Бутидэй Галсантай уулзахадамнай, үе наһандаа хүдөө талада мал үдхэһэн ажалай ветеран иигэжэ хөөрөө бэлэй: «Бидэ гэр бүлөөрөө Забайкалиин нарин нооһото үүлтэрэй хонидые харалсаhан байнабди.
Дэлгэрэнгыгээр 40-дэхи дугаарта.
