Агын аймагай хүдөө ажахынхид дүнгүүдээ татажа, эрхим ажахынуудые, малшадые амаршалаа. Аймагай хүдөө ажахын таһагые даагша Владимир Намжиловай тайлбарилһаар, үмсэ хамтагүй зон хэрэгтэй үбһэеэ бэлдэжэ, хорёо руугаа оруулжа байна. Байгша ондо үбһэ ногоон һайнаар ургаа, үбһэшэдэй ажалаа һаатуулангүй ябуулха хэрэгтэ байгаалиин уларилшье нүлөөлөө бшуу. Малай хоол бэлдэлгээр аймагай штаб байгуулагдажа, харюусалгата ажал хинажа байгаа. Үбһэшэдэй оньһожоруулагдамал бригадануудай, хамтын ба фермерскэ ажахынуудай хоорондо малай хоол нөөсэлэлгөөр мүрысөөн эмхидхэгдэһэн байна.
Байгша ондо Агын аймагай нуга сабшаланууд дээрэ 245 трактор, 235 косилка, 100 пресс-подборщик, һүри хаядаг 50 гаран түхеэрэлтэ ашаглагдаа. Тиихэдэ оньһожоруулагдамал 5 ба малшадай 200 гаран бригада малай хоол бэлдэһэн байнад. Бүхыдөө хамтын ажахынууд 73183 тонно малай хоол бэлдэжэ, малшадай буусануудаар тарааһан байна. Энэ болбол малай хоол табигдаһан түсэбһөө гурбан хубяар ехээр нөөсэлэгдөө. Харин фермерскэ ажахынууд 26526 тонно бэлдээ, түсэбөө 100 хубяар дүүргэжэ шадаа. Нэгэ толгой малда 8 центнер хоол бэлдэгдээ бшуу.
Мүрысөөнэй дүнгүүдээр, «Һүдэнтэ», «Урда-Ага», Калининай нэрэмжэтэ хамтын ажахынууд, Аяк Далаевай, Чингис Алексеевэй (Хүнхэр), Баир Дондоковой (Согто-Хангил) фермерскэ ажахынууд намарай сагта эрхимээр ажаллажа, хорёогоор дүүрэн малай хоолтой болоһон байна. Хүнхэрэй Дэрдэб Жигжитовэй, Будаланай Саян Дамдиновай, Хойто-Агын Мунко-Жаргал Жамьяновай, Урда-Агын Бато Очировай, Согто-Хангилай Амгалан Норбоевой, Үбэр-Аргалиин Дугар Должитовай ударидадаг үбһэшэдэй бригаданууд эрхимээр ажаллажа, мүнгэн шангуудта хүртөө. Үмсын хамһабариин ажахынуудай хоорондо Һүдэнтын Б.Жалсапов, Гүнэйн Валерий Аюров, Будаланай Энхэ Загдаев гэгшэд эгээл ехээр үбһэ тэжээл бэлдэжэ шадаа. «Хойто-Ага» ажахын түрүүлэгшэ Цырен-Дылык Эрдынеевтэ Россиин Хүдөө ажахын яаманай Хүндэлэлэй грамота барюулагдаһан байна. «Урдо-Ага» ажахын түрүүлэгшэ Биликто Ринчиновтэ «Россиин АПК-гай хүндэтэ хүдэлмэрилэгшэ» гэһэн хүндэтэ нэрэ зэргэ олгогдоо.
Аймаг дотор ургаса хуряалга үргэлжэлһөөр. Олон ажахынууд орооһото культурануудаа хуряажа дүүргээд, зелёнко хуряажа байна. Тиихэдэ таряа ехээр ургуулдаг «Хүнхэр» ажахыда алтан шаргал таряа хуряалгын ажал түлэг дундаа. Харюусалгата ажалынь ноябриин тэнгээр дүүрэхээр түсэблэгдэнэ. Таряашад нэгэ гектар газарһаа 19 центнер ургаса хуряажа байна бшуу.
Эрдэни ЧИМИТДОРЖИЕВ.
