Мүнөө жэл үбһэ ногооной ургаса һайн. Тиибэшье июль һарада хура бороо орожо, доро газар уһанда абтаад, сабшахын аргагүй байгаа. Бэшэшье шалтагаанаар хүн зон үбһэндэ орой гараа.
Сагаан-Уула нютагай сабшалан дээрэ. Ц.Доржинимаевай фото.
Агын Буряадай тойрогой Захиргаанай АПК-гай таһагай мэдээсэһээр, бүхы ажахынуудта (СХП ба КФХ) 100988 толгой мал үбэлжэлгэдэ орохо юм. Үбһэ бэлдэлгын түсэб – 58274 тонно. Августын 26-ай байдалаар, 19650 тонно үбһэн бэлдэгдээд байна. Энэнь түсэбэй 33,8 хуби болоно. Агын, Могойтын ба Дулдаргын аймагайхид тус тустаа 13322, 4699 ба 1629 тонно үбһэ сабшажа нөөсэлһэн байна. «Хүнхэр» ажахынхид тон ехэ 1009 тонно үбһэ сабшаад ябана. Түсэбынь – 2457 тонно. Удаадахи һууринуудта гараһан согто-хангилайхид – 700, будаланайхид – 495, хойто-агынхид 410 тонно үбһэ тэжээл бэлдээд байна. Мүн «Аргал», «Түншэ», «Соло», «Хула», «Гэрэл» ООО-гойхид үбһэ сабшалгаар һайн дүнгүүдые туйлана.
Агын тойрогто үмсын мал нилээд олон байна. Үмсын хамһабариин ажахынуудта (ЛПХ) 67634 мал бии. Тэдэнэр 117938 тонно үбһэ бэлдэхэ түсэбтэй. Тэрэнэйнгээ 37559 тонно үбһэ сабшажа, 31,8 хубяар дүүргэжэ ябана. Мүнөө нарата үдэрнүүдые һамбаашалан, үбһэшэд түсэбөө дүүргэхын тула сүлөөгүй шармайна.
Жалсан ЛУБСАНДАШИЕВ.
