Хүнхэрэй комбайнернууд обёос вал болгожо унагаана.Авторай фото-зураг.
Тойрогой таряашад поли дээгүүр орооhото культурануудые хуряана.
Ган жэлhээ таряа ногоон энэ жэлдэ мүртэй ургаагүй гэжэ мэдээжэ. Зунай халуун наран доро тойрогой ажахынуудай диилэнхи хуби таряалан шатаа. Олон ажахынууд малдаашье эдюулхэ таряа абахагүйнь. Ган жэл болобошье, таряаланаа hайнаар ажаллажа, эрхим ургаса абажа байhан ажахынуудшье үсѳѳн бэшэ бшуу.
Забайкалиин хизаарай түрүү ажахынуудай нэгэн болодог Хүнхэрэй таряашад ган хуурайшье жэлдэ орооhото культурануудые ехээр тарижа, намартаа эрхим ургаса хуряадагаараа холо ойгуур суутай. Хүнхэрэй таряан ажахы «Сүүгэл» гэжэ нэрэтэй орооhо таряа ургуулдаг стан дээрэ оршодог. Жэлэй дүрбэн сагта Сүүгэл дээрэ ажал сүлѳѳ забдагүй ябуулагдадаг гуримтай. Мүнѳѳ эндэ намарай ажал бүри эршэдэнхэй. Ажахы хүрэжэ ерэхэдэ, сүлѳѳтэй хүн үгы, тракторнуудшье хомор. Барандаа поли дээрэ гаранхай. Холоhоо харгын тооhо бушхуулhан КамАЗ-ууд тэргээр дүүрэн таряа ашанхай тоог руу орожо, ашаагаа буулгаад, hѳѳргѳѳ поли руугаа гүйлгэлдэнэ. Нэгэ КамАЗ тогтожо, тэндэhээ жолоошониинь буухадаа, «Хүнхэр» ажахын ахамад агроном Балдан Далаев байба. «Таряа хуряалгын сүлѳѳгүй ажал ябажа байна. Комбайнууднай тогтон торонгүй хүдэлнэ», - гэhээр, тэрэ айлшадые угтаа. Айлшадай дунда хизаарай Хүдѳѳ ажахын министерствын таряа ургуулгын таhагай гол мэргэжэлтэн Артём Устинов, «Забайкалмелиоводхоз» гэhэн гүрэнэй эмхиин ахамад гидротехник Светлана Поклодок гэгшэд дээрэhээ үгтэhэн тусхай даабаритай ябаа. Ушар гэхэдэ, ашаглагдадаггүй полинуудые хахалха, таряалан дээрэхи томо шулуунуудые суглуулжа хаяха г.м. хүдэлмэринүүдые эмхидхэлгэдэ ажахынуудта хизаарай бюджедhээ субсидии тараагдаhан байха юм. Эдэ хүдэлмэринүүд хэр дүүргэгдээб гэжэ тэдэ шалгажа ябаа бшуу. Мэргэжэлтэд Харымай, Бооржын, Александрово-Заводскойн, Петровск-Забайкальскиин, Yлеэтын, Агын аймагай хүдѳѳ ажахынуудаар ябажа хараа.
Агроном Балдан Доржиевичай хэлэhээр, хүнхэрэйхид 300 га газар поли хахалжа, ерэхэ жэлдэ орооhото культурануудые тэндээ тариха түсэбтэй. Энэ газар дээрэ урда тээнь үбhэ сабшадаг байhан. «Сүүгэл» ажахын 14 комбайн шэниисын, обёосой, горохой поли дээгүүр гаража, алтан шаргал таряа хуряана. «Комбайнууд сентябриин 17-hоо таряалангууд дээрэ гараа hэн. Байгша ондо ургаса хуряалгамнай орой эхилээ. Сентябриин эхеэр ороhон бороон hаалта хээ. Таряан хатажа ядаа. Таряан урда жэлнүүдhээ муу байба. Тиибэшье түсэбтѳѳ хүрэмэ абаха байхабди», - гэжэ Балдан Далаев хѳѳрэнэ.
Дэлгэрэнгыгээр 40-дэхи дугаарта.
