Байгша ондо тойрогой хүдөө ажахынхид 153 мянган тонно малай хоол нөөсэлхэ даабаритай. Нэгэ толгой малда 8,4 центнер тэжээл нөөсэлэгдэхэ ёһотой бшуу. Хараалагдаһан түсэбөө дүүргэхын тула үбһэшэдтэ нарата үдэрнүүд сэнтэй. Бороогой һаалта хээгүйл һаа, малай хоол барагсаан бэлдэхэ найдал бии. Үнгэрэгшэ жэл хамтын ажахынууд 171,8 мянган тонно тухай малай хоол нөөсэлөө һэн.
Бороотой үрдилдэжэ, малай тэжээл бэлэдхэлэй ажал ябана
Будалан нютагай фермер Баяржаб Дугаровай ажахын буусада Агын аймагай хүдөө ажахынхид сугларжа, байгша ондо хэды шэнээн малай хоол нөөсэлхэб, хаанаһаа, хэды сэнтэй шэнгэн түлишөөр, түмэр түдэгэнүүдэй нөөсөөр хангагдахаб г.м. асуудалнуудаар эртүүр хөөрэлдөө эмхидхэһэн байгаа. Тус аймагай захиргаанай хүдөө ажахын таһагые даагша Владимир Намжиловай үбһэ хуряалга тухай мэдүүлһээр, ниитын малай ерэхэ жэлэй ута нюргатай үбэлые ядамаргүй дабахын тула ажахынуудта 63842 тонно малай тэжээл нөөсэлхэ хэрэгтэй. Тэрэ тоодо фермернүүд 25682 тонно бэлдэхэ түсэбтэй. Ерэхэ жэлэй малай үбэлжэлгэдэ 34455 толгой эбэртэ бодо мал, 25470 хонин, 7166 адуун һүрэг орохоор хараалагдана.
Харюусалгатай кампанида малшадай ба оньһожоруулагдамал 170 бригада нуга сабшаланууд дээрэ хүдэлжэ ябана. Бригадануудта элдэб түхэлэй 220 трактор, 225 косилка, 45 пресс-подборщик ба бусад техникэ хабаадуулагдана. Малай хоол бэлдэжэ ябаһан зоной ажал урмашуулхын тула малаар, таряагаар түлэхэ хэлсээн баталагданхай. Үбһэ хуряалга шалгажа байха штабууд байгуулагданхай.
Ногооной ургаса мүнөө жэл һайн. Бороотой зун боложо, малда хүсэд хүрэхэ үбһэ тэжээл нөөсэлхэ арга бии. Үнгэрэгшэ зунай хаһада ган гасуурһаа боложо, үбһэн муугаар ургаа һэн. Шэнгэн түлишөөр хангалга хэсүүшэг байна. Үбһэнэй эхилхэдэ, сэнгынь дээшэлдэг гуримтай. Литр соляркын сэн 76 түхэригтэ болонхой. Ажахынууд мяха, нооһо тушаажа олоһон мүнгөөрөө ба субсидиин ашаар солярка, тоһо абана.
Аймагай фермернүүд Базар Батоев, Батор Жаргалов, Бато Цыденешиев ба бусад, «Хүнхэр», «Урда-Ага», «Аргал», Калининай нэрэмжэтэ ажахынууд эгээл олон малтай. Тэдэ ажахынууд малай хоол ехээр нөөсэлхэ зорилготой. Аймагай хойто бэеын ажахынууд, илангаяа «Хойто-Ага» ажахын үбһэшэд, үмсынхид үбһэндөө эгээл эртэ ородог гуримтай. Үбһэ сабшадаг газарынь ой модон соо оршодог, мүн эртэ хюруу унадаг. Тиибэшье хойто-агынхид малай хоол бэлдэжэ, ажалаа ябуулжа байна. Угайдхадаа, энэ жэл бороотой байжа, зарим сабшалан уһанда абтаһан байна. Тиихэдэнь газарай хататар хүлеэхэ баатай болоно. Урда жэлнүүдтэ хуурай байдаг һаа, мүнөө үрхэлжэ ороһон бороон һаалта болоо.
