Хойто-Ага нютаг ой модоор, уһа голоор, хада гүбээнүүдээр баян юм. «Хойто-Ага – кругом тайга» гэжэ дэмы хэлэгдэдэггүй. Зундаа элдэб үнгын сэсэг болон ургамал ногоон набша намаагаа надхуулан ургажа, анхилма һайхан үнэрөөр хангалтадаг. Үдхэн шэрэнги ой соо амтан жэмэс ба һархяагуудые, янза бүриин ногоо болон ургамалнуудые олохоор. Урдань энээгүүр үндэр зиндаатай лама санаартан, эмшэд ябажа, хүнэй бэеын энхэ элүүртэ хэрэгтэй болохо ургамалнуудые түүдэг байһан тухай Хойто-Агын музейе даагша Ким Цыренханда эгэшэ хөөрөө һэн.
   Мүн Хойто-Агын Доодо хүндыдэ Даша-Хонхор гэжэ газар оршодог. Иимэ һайхан байгаалитай газарта ерээдүй сагта бандида хамба лама боложо заларха Эрдынеев Жимба-Жамса лама 1907 ондо түрэһэн байна. Мүнөө тоонтодонь бандида хамбын түрэһөөр 100 жэлэй ойдо зорюулагдажа, 2007 ондо субарга бодхоогдоһон. Энэ субаргын дэргэдэ жэл бүхэндэ Үбэр Байгалай хизаараар дид хамба лама Цырен Дондукбаев ба Агын дасанай шэрээтэ Бадма Цыбиковэй хүтэлбэри доро Дара эхэдэ зорюулагдаһан уншалга үнгэргэгдэдэг. Энэ уншалгада ганса Хойто-Агын бэшэ, харин ондоо нютагуудай һүзэгшэд ерэжэ, эхэ зургаан зүйл, хамаг амитанай ба амгалан байдалай түлөө зальбардаг, буян үйлэдэдэг.

You have no rights to post comments