Монголой Булган аймагта «Алтаргана» нааданай үедэ Эрдэнэт хотын захиргаанай гадаадын харилсаанай хүтэлэгшэ мэргэжэлтэн Жанчувнын Сандужав ахатай уулзаабди. Тэрэ энэ тушаалда 17 жэл хүдэлнэ. Монголдоо багшанарай дээдэ һургуули ород хэлэнэй ба литературын багша мэргэжэлтэй дүүргэһэн юм.
Тиихэдэ августын 1-2-то Эрдэнэт хото 50 жэлэйнгээ ойн баяр тэмдэглэхэеэ байна гэжэ мэдээсээ һэн.
Эрдэнэт хото Монголой хойто зүгтэ, Сэлэнгэ ба Орхон голнуудай дунда, Улаан-Баатарһаа 375 модо зайда, Булган аймагай түбһөө 60 модо зай хойшоо, Россиин хилэһээ 140 модо зайда оршодог юм. Дэлхэйн зэд ба молибденээр эгээ элбэг Эрдэнэтийн-Обоогой үйлэдбэрилэгдэжэ эхилхэдэ, хажуудань «Эрдэнэт» гэжэ ашагта малтамал шанаржуулгын комбинат баригдаһан. Хажуудань Эрдэнэт хото 1974 ондо байгуулагдаһан юм. Мүнөө энэ хото (Улаан-Баатар, Дархан хотонуудай һүүлээр) – Монголой 3-дахи томо хото болодог, 90 мянгаад ажаһуугшадтай. Олон дабхар гэрнүүдтэй 6 хороотой ба һэеы гэрнүүдэй хотонһоо бүридэдэг, хойто зүгтэнь коттеджнэ тосхон бии. Монгол Уласай түмэр харгын түб замай «Салхит» гэжэ станциһаа «Эрдэнэт» станци тон захын болодог. Энэ станциһаа Зүүн Сибириин түмэр харгын Наушки, али Хитадай түмэр харгын Эрээн-Хото хүрэтэр ошохоор.
Эрдэнэт хотые ба «Эрдэнэт» комбинат совет мэргэжэлтэд бариһан. Домогоор, энэ газарта анханда хитадууд зэд малтадаг байһан, харин аадарай үедэ сахилгаанда ехээр сохюулжа хосорһон. Тэрэ гэһээр Эрдэнэтийн-Обоое нангин гэжэ тоолодог, тэндэ үргэдэг, мүргэдэг болоһон ха, оройдонь эхэнэрнүүдэй гарахань хорюултай.
1974 ондо ЦК КПСС-эй Генеральна секретарь Л.Брежнев албанай хэрэгээр ерэжэ, «Эрдэнэт» комплекс барилгаар Советскэ Союзай ба Монгол Засагай Газарай хоорондын хэлсээ баталһан байна. Л.Вавакинай хүтэлбэри доро совет архитекторнүүд хотын юрэнхы түсэб зохёоһон юм. Тиигэжэ талын дунда шэнэ комбинат тобойн бодожо эхилээ.
1975 оной декабриин 11-дэ Монгол Арадай Уласай Агууехэ Арадай Хуралай зарлигаар Эрдэнэт хотодо хотын зэргэ олгогдоһон байна.
«Эрдэнэт» эмхи хадаа хотын хүгжэлтэ хангадаг үйлэдбэри болоно. 2016 онһоо эхин хүрэнгэнь Монгол Уласай болоһон (энэ болотор 49 хубинь Россиин Федерациин байһан). 2016 ондо Росси акциингаа хуби «Эрдэнэт» СП-дэ худалдажа, «Эрдэнэт» Монгол гүрэнэй мэдэлэй эмхи болоһон. 2015 ондо 6 сая тонно үйлэдбэрилхэ шэнэ лини байгуулагдаһан. 2021 ондо 32,63 сая тонно руда үйлэдбэрилөө. 2020 ондо шэнэ лини барюулжа, техническэ шэнэ үндэһэн дээрэ нарижуулгын һүүлээр жэлэй үйлэдбэрилгэнь 38 сая тонно болоһон. Монголой ВВП 13,5 хуби болодог юм. Үйлэдбэриин эмхидэ 6 мянга гаран хүн хүдэлдэг.
Дэлгэрэнгыгээр «Толон» һониной 25-дахи дугаарта уншагты.
