Будалан нютагай аха үеын зон Булагай адагайбди гэжэ хэлэжэ ябадаг юм. Янгинама хүйтэнэй сагта булаг нэгэшье хүрэдэггүй, газар дороһоо арюун тунгалаг сэбэр уһан сорьёлон гаража байдаг гээшэ. Нютагай хэдэн үе арад зон энэл булагай уһа уужа үндыһэн. Энэ нютаг гайхамшагта гоё һайхан байгаалитай, ашагта малтамалнуудаар баян. Нютагай дэбисхэр дээрэ барилгада хэрэглэгдэдэг шулуун, элһэн, шабар ба бусад баялигууд бии. 1962 оной июль һарада Баруун Буганда гэжэ газарта геологууд 115 кг шэгнүүртэй тэнгэриин шулуу (метеорит) олоһон. Иимэ элдин һайхан байгаалитай, түүхэ домогуудаар баян газарта Будалан нютагай ажаһуугшад хэтын хэтэдэ адуу малаа арьбадхажа, үри хүүгэдээ үндылгэжэ, ажана тэнюун ажаһууна.

You have no rights to post comments