Олоной оролдолгоор ном «нара хараа»
Россиин габьяата багша, Һүдэнтын дунда һургуулиин захиралаар олон жэл амжалтатай ажаллаһан Ганжитма Цыреторовна Жалсанова түлэблэлэй хүтэлбэрилэгшэ, номой харюусалгата редактор, автор юм. Тэрэнэй хүтэлбэри доро 1923 онһоо 2023 он болотор Һүдэнтын һургуулиин хүгжэлтын шатанууд тухай түүхэтэ баримтанууд суглуулагдажа, номдо ороһон юм. Ном бүридхэгшэд Һүдэнтын эхин шатын, долоон, найман жэлнүүдэй, дунда һургуулиин түүхэ уудалжа, элдэб үе сагта хүдэлһэн багшанарай, һургуули дүүргэгшэдэй һанамжануудые, намтар бэшээ, һуралсалда болоһон үйлэ хэрэгүүд тушаа материалнуудые суглуулаа. Номой автор Ганжитма Жалсановатай уулзажа, хоёр боти номой хэблэгдэжэ гараһан тухай тодорхойгоор хөөрэлдөөбди.
- Ганжитма Цыреторовна, «Вековая летопись Судунтуйской средней школы имени Цыбена Жамцарано» гэжэ хоёр ботитой ном хэблүүлжэ гаргаха үүсхэл танай байгаа гү? Юунһээ эхилээ гээшэбта, хөөрэжэ үгыт.
- 2023 ондо Һүдэнтымнай дунда һургуули зуутай болоо. Һургуули бүхэн 100 жэлэйнгээ ойн баярта зорюулжа, ном хэблүүлжэ гаргадаг заншалтай гээшэ ааб даа. Ойн баярай тэмдэглэгдэхэһээ хоёр жэл урид эмхидхэлэй гэшүүдэй зүблөөн дээрэ түрэл һургуулидаа зорюулжа, ном гаргаха тухай дурадхал оруулаа һэм. Зүблөөндэ хабаадаһан һургуулиин захирал Дондок Дараев, орлогшонь Дынсыма Цыбенова, тойрогой Захиргаанай хүтэлбэрилэгшын орлогшо ябаһан Билигма Будаева, Агын социальна һалбариин ажалтадай мэргэжэл дээшэ-лүүлгын институдай ректор Лхама Рабданова ба бусад дурадхалыем дэмжээ һэн. Ном бэшэхэ гээшэ бэлэн хэрэг бэшэ, шадабари, оролдолго хэрэгтэй. Юунһээ эхилхэ байгаабибди гэлсэһээр, хөөрэлдэһөөр байтарнай, һургуулиимнай ойн баяр дүтэлөөд, һайндэрөө номгүйгөөр угтаабди... Һүдэнтын дунда һургуулида удаан сагта хү-дэлжэ байһан багшанар намда хонходожо: «Цыреторовна, номоо бэлдэжэ эхилхэмнай гү?» – гэхэдэнь дэмжээб. Удангүй ном дээрэ хүдэлхэ зониие бүридхөөбди, юу бэшэхэбибди, оруулхабибди гэжэ эбтэйгээр зүбшэлсэһэн байнабди. Номой бүлэг, рубрика, гаршаг дээрэ өөрөө һуужа хүдэлөөб. Улаан-Үдэ хотын «Республиканская типография» эмхидэ ажалладаг нютагайнгаа хүбүүн Бато Солбонович Махазагдаевта һайн саарһан дээрэ гоёор шэмэглэгдэһэн гадартай ном гаргаха, мүн бэрхэ дизайнерые бэдэрхэ гуйлтатайгаар хандаһан байнабди. Бато Солбонович бэрхэ дизайнер Елена Шведоватай хэлсэжэ, ажал ябуулжа эхилээ һэн.
Хоёр боти номоймнай сэн 2 сая 700 гара мянган түхэригтэ болоо. Үнэтэй болоошье һаань, ном гаргаха хэрэгтэй. Һүдэнтэ нютагай захиргаанай толгойлогшо Жаргал Дагбаевай һууринайнгаа ажаһуугшадта, һургуули дүүргэгшэдтэ хандалга бэшэхэдэнь, бүхы зон дэмжэжэ, туһаламжа хүргөө. Холо ойгуур ажаһуудаг һүдэнтынхид, һургуули дүүргэһэн зон, багшанар, ветеранууд – хүгшэн залуугүй бүгэдөөрэн мүнгэ суглуулжа, номой «нара хараха» хэрэгтэ туһалаа.
Дэлгэрэнгыгээр "Толон" һониной 28-дахи дугаарта уншагты.
