Фермерэй бууса.

   «АЛТАРГАНЫН» НҮЛѲѲН ЕХЭ

   Нэн түрүүн, «Алтаргана-2016» нааданай илагша гэһэн зэргэһээнь һабагшалая. Ушарынь гэхэдэ, бүгэдэ буряадай энэ наадан, үнэхөөрөөл, ондо ондоо орон нютагуудта ажаһуудаг буряадуудые танилсуулна, нүхэсүүлнэ бшуу. Мүнөө «Алтаргана-2020» нааданда бэлэдхэл эхилэнхэй, Үбэр Байгалай хизаарай амбан захирагшын уялга дүүргэгшэ Александр Осипов эмхидхэлэй хороон өөрөө толгойлоо гэжэ бэшээ бэлэйбди. «Ёһотой һайндэрэй оршон байгуулха, энэ наадандаа али болохоор олон хабаадагшадые, айлшадые хабаадуулха хэрэгтэй...» - гээд Александр Михайлович нэгэтэ бэшэ хэлэнэ. Эндэ һая үнгэргэгдэһэн Агын тойрогой Захиргаанай тоосоото суглаанай хэмжээндэ «Алтаргана-2018» нааданай дүнгүүд, Агада эмхидхэгдэхэ нааданда бэлэдхэл тухай баһал хэлэгдээ.
   «Алтаргана» нааданай мүрысөөнүүдэй нэгэн – мори урилдаан олоной анхарал ехэтэ татадаг, энэ бүгэдэ буряадай нааданай үедэ газар газарһаа сугларһан моришод, гүйгөөшэдые һургадаг һоригшод уулзадаг, бэе бэетэеэ танилсадаг гээшэ.
   «Алтаргана-2020» нааданай программада «Морин эрдэни» гэһэн мориной тоног зэмсэгэй харалга-мүрысөө оруулха үүсхэл агынхид гаргажа байна. Энэнь гурбан гүрэнэй – Ородой, Монголой, Хитадай болон Россиин буряад угсаатанай ажаһуудаг нютаг оронуудай морин эрдэнидэ хабаатай зоной – моришодой, уран дархашуулай бэе бэетэеэ танилсаха, дүй дүршэлөөрөө андалдаха хэрэгтэ ехэ нүлөөтэй байхаар.
   Бидэ, «Толон» һониной сурбалжалагшад, Эрхүү хото «Алтаргана-2018» нааданда ошохо замдаа Буряад ороной эрхим фермернүүдэй нэгэн, мэдээжэ мори һоригшо, үүлтэртэ адуу үсхэбэрилэгшэ Виктор Жигжитовэй буусада хүрэһэн байнабди.

БУУСАДАНЬ

   Энэ бууса Хориин аймагай Баянгол нютагай Шүбгэ гэһэн газарта оршодог. Хэды ган гасуурай болоошье һаань, хатадаггүй Шүбгэ голой нэрээр нэршэһэн газар. Энэ гол зубшан, совет үедэ баригдаһан аад, үнинэй орхисооной боложо, жэбэрһэн, модо бургааһа ургашаһан уһалууриин системэ 7 модо тухай газарта Жигжитовтэн шэнэлээ. Тиимэһээ Хориһоо гараад ябахадамнай, хундан шара тала байһан аад, буусада дүтэлхэдэ, нуга сабшалангынь холоһоо ногооржо байгаа бэлэй.
   Буусынь баруун тээхи гүбээгэй оройдо гарахада, үдхэн ургасатай, хорёолоотой ехэ таряалан нюдэ хужарлуулна. Фермер адуу үсхэбэрилдэг юм, илангаяа гүйгөөшэ моридто анхаралаа ехээр хандуулна. Хажуугаарнь эбэртэ бодо мал, хони ямаа, гахай үсхэбэрилнэ.
   Жигжитовтэн уужам, болбосон түхэлтэй гэртэй, бад гэмээр баряатай олон тоото дал хорёонууд, хонидой нооһо хиргадаг, зайн галаар хангаатай пункт, огород, таримал олон сэсэгүүд - ажалша зоной гараар түхеэрэгдэһэн дангигар бууса.
   Хэзээшье, үүлтэртэ адуу үсхэбэрилгэдэ ехэ мүнгэн гаргашалагдана. Тиимэһээ фермерэй бүлэ зарим гаршаяа грантнуудаар хаахые эрмэлзэдэг. 2013 онһоо фермернүүд боложо, «Поддержка начинающих фермеров» конкурсдо хабаадажа, 1 сая 200 мянган түхэригэй грант шүүгээ. Нэгэ сая түхэригөөрнь техникэ абаад, 200 мянгыень гэрэй барилгада гаргашалһан ха. 

You have no rights to post comments