Элдин һайхан Табтаанай һууринда нютагжажа, ажабайдалаа түхеэржэ, амгалан тэнюун ажаһуудаг Сэсэг Раднабазаровна Батоцыренова 6 жэл тухай долоон хоногой нэгэ удаа гарадаг «Толон» газетэ нютагайхидтаа дэлгэрүүлһээр, тарааһаар зандаа юм.
Сэсэг Раднабазаровнагай балшар бага наһан 33 Партизануудай нэрэмжэтэ хуторта үнгэрһэн. Бэеэ хүсэжэ, томо болобошье, хэдэн жэл Агын КБО-до, удаань милициин албанда секретаряар хүдэлһэн гээшэ. 1990 ондо Табтаанай нютаг зѳѳжэ ерэһэн байна. 1991 ондо тэрэ Табтаанай нютагай Дугар хүбүүнтэй инаг дуранай охиндо абтажа, гал гуламтаяа нэгэдүүлжэ, нэгэ амин боложо ажаһууха гэжэ шиидэһэн юм. Тэрэ гэһэнһээ хойшо 25 жэлэй хугасаа соо табан үри хүүгэдые үндылгэжэ, гарыень ганзагада, хүлыень дүрѳѳдэ хүргэжэ, хүнэй зэргэ хүн болгоһон. Мүнѳѳ хүүгэдынь хайрата аба эжыдээ табан аша зээнэрые бэлэглэнхэй, амар мэндэ ажаһуунад.
Тэбхэр зургаан жэлэй саана Сэсэг Раднабазаровна ѳѳр дээрээ «Толон» газетэдэ захил эмхидхэлгын ажал абажа, нютаг дээрээ дэлгэрүүлжэ эхилһэн гээшэ. «Анханда 90 гаран хүн захидаг һаа, мүнѳѳ 55 хүн «Толон» уншадаг. Жэлһээ жэлдэ буряадаар уншаха хүн үсѳѳржэл байна», - гээд тэмдэглэнэ һэн. Пенсиин, субсидиин гараха үедэ Сэсэг Раднабазаровна почто ошожо, захилай мүнгэ суглуулдаг. «Түрүүн гэртээ захил хүүлэжэ эхилһэнби, мүнѳѳ наймаашанаар хүдэлжэ байхадаа, газетэ наймаадаа тараадаг болоһонби. "Толон" газетэеэ захигты гэжэ нютагайхидаа баалажа хүүлэхэшье саг болодог. Ургажа ябаһан хүүгэд ород хэлэн дээрэ ярилдахаа һанадаг болоһон, теэд ородоор дуугараашье һаа, үбгэ эсэгэнэрэйнгээ заяаһан эхэ хэлэ мартаха ёһогүйл даа гэжэ һанагшаб», - гээд тэрэ хэлэнэ.
Иигэжэ нютаг дээрээ «Толон» газетэдэ захил эмхидхэхэдээ, Сэсэг Раднабазаровна буряад хэлэ хүгжѳѳлгэдэ хубитаяа оруулжа байна гэхэдэ, алдуу болохогүй. Урагшаа һанаатай, хүхюун зантай Сэсэг Батоцыреновада ажабайдалдань амжалта, энхэ элүүрые, амгалан тэнюун ажаһуухыень хүсэнэбди.
Дэлгэрэнгыгээр 48-дахи дугаарта.
