Гэнтэ Бата аха хэлэбэ гээшэ: - Медаль абаха гээшэ юрэндаа юм даа, амиды үлэбэл.
Юун болоһон байгааб гэхэдэ, иимэ удхатай. Добтолгодо ороһон манай нэгэ бүлэг сэрэгшэд хүреэлгэдэ орожо, нэгэ бүлэг хуһан ой соо хороо һэн ха. Сүүдхэ боложо, тэдэнэр буу һомоной талаар шахардуу байдалда оробо. Гэдэргээ сухариха эрхэ байхагүй, туһаламжашье ерэнэгүй. Командирынь үглөөнэй боро хараанаар частьяа бэшэг эльгээхэ гэжэ шиидэбэ. Тиишээ ошохо хүниинь хахад модо тухай нюсэгэн шахуу тала гараха байгаа. Эльгээһэн хоёр сэрэгшэд хойно хойноһоонь алуулба хэбэртэй. Ногооной үндэршье һаань, мүлхижэ ябаһан хүниие ойлгохоор байгаа. Хажуудаа байһан Бата ахые командирынь харажархёод хэлэбэ:
- Ну, Нимбуев, попробуй. (Ну, нүхэр Нимбуев, туршахал болобош).
Архи эрихэдэнь, кружка шахуу аягалба. Тэрэнииень уужархихадань, үшөө дурадхаба. Арсаба. Шинелиингээ шагтануудые тайлажархёод, пакедээ хирэм дороо хабшуулжархинхай, хотиржо ябаад гүйжэрхёо һэн ха. Өөһэдынхидтөө хүрэхэдөө, гурба дахин буудуулһан, котелогынь соо буудуулһан байгаа.
Амиды мэндэ хүрэһэнэйхиеэ гэхэ юм гү, юрэдөөл, «За отвагу» гэһэн солдадуудай хүндэтэ медальда хүртэхэ талаантай байгаа бэлэй.
1941 оной июлиин 26-да армида мордожо, 1942 оной январь һарада 777-дохи стрелково полкдо нютагайнгаа залуу нүхэр Дамдинжаповтай фронт эльгээгдээ һэн ха. Вагон соогоо хаарта наадажа, нүхэдынь сагаа үнгэргэдэг, хаа-яа арсалдадагшье байгаа.
Нэгэтэ Мижеэхэй нүхэрынь вагонһоо хаюулхаа байгаа. Буугаа зэһэжэрхиһэн Бата аха ехэ гэгшээр бэлиндээд хашхарба:
- Һөөргэнь табигты, үгы һаатнай бултыетнай буудажархихаб, намда хаанашье үхэбэл хамаагүй. Тэрээнһээ хойшо нүхэдынь нүхэр Нимбуевай үгэ дууладаг байһан ха. Тиигээдшье бултанһаань холо аха байгаа. Хаанаһаа ородоор хараажа һураһан байгааб гэхэдэ, хубисхалай үедэ бүлөөрөө Монгол гараад ябаһан аад, бусажа, Дуралгын ородуудай дунда саг баглажа ажаһууһан байгаа. Дайнда ороходоо, Мижеэхэй нүхэртэеэ хахасаһан байгаа юм.
Младша сержант, медальтай болоһон, хоёр дахин шархатаһан, санинструктор болонхой, шанга байлдаанай һүүлээр һарын сагаанда шархатаһан зониие бэдэржэ ябаба. Гэнтэ дуулан гэхэдэнь, хэншьеб аалиханаар нэрээрнь ооголбо. Абяагаарнь ошоходонь, Мижеэхэй нүхэрынь толгойгоо шархатаһан, һөөгэй бооридо хэбтэбэ. Тэрэ гүнгэнөөгөөрнь буряад гэжэ ойлгоод, Батал байгаа ёһотой гэжэ мэдээ. Ротоһоонь долоон хүн үлэһэн байгаа.
Нүхэр Нимбуев ахамнай 1942 оной намар хүндөөр шархатажа, гэртээ табигдаад, 1943 оной намар дахин армида абтаа.
Хоёрдохи Белорусска фронтын 240-дэхи стрелково дивизидэ Рокоссовскиин командовани доро дайшалхы замаа үргэлжэлүүлжэ, Эсэгын дайнай «Улаан Одон» орденоор шагнагдаһан намтартай.
1945 оной июлиин 1-дэ армиһаа табигдажа, бүхы наһан соогоо хонишоноор хүдэлжэ, «За трудовое отличие», Ленинэй түрэһөөр 100 жэлэй ойн баярай медальнуудаар, ВДНХ-гай путёвкоор шагнагдаһан.
Хоёр хүбүүдые үндылгэжэ, зургаан ашанартай болоо. Ехэ ашань мүнөө Эрхүү хотодо дасанай шэрээтэ болонхой ажаһууна. Ехэ һонин гэхэдэ, хүгшэн абань наһатай болоходоо, бурханайнгаа гурбан ном үлөөгөөд, абадань хэлэһэн гэхэ: «Эдэ номуудые хадагалжа ябаарай, эдэ номуудые эдлэхэ хүбүүн манай бүлэдэ түрэхэ ёһотой». Тиигэжэ гунгарбаатайнь, үлэһэн номуудтайнь дасан абаашажа үргэһэн ха.
