Ж.Балданжабоной нэрэмжэтэ Агын уран зохёолой нэгэдэлэй гэшүүн ябаhан, уран шүлэгшэн Батожаргал Шагдаров мүнѳѳ мэндэ ябаа һаа, 80 жэлэйнгээ ойн баяр тэмдэглэхэ байгаа.
Батожаргал Шагдаров 1936 оной августын 1-дэ Сахюурта hууринай Дунда Горхондо түрэhэн. Найматайдаа Дунда Агын hургуулида ороhон, суг hураhан үетэниинь гэхэдэ, Барадин Бато аха, Этигэлэй Намсалма, Цыремпилэй Һама абгайнар байнад. Һүүлээрнь Урда-Агын 7 жэлэй hургуули дүүргээ. Дагба Жигжитович Жигжитовэй хүтэлбэри доро hургуулиин дэргэдэхи участогта хүдэлдэг, ботаника, биологи хэшээлнүүдээр hонирходог, тоhон шэрээр һуралсалай пособи зурадаг, гартаа дүрэтэй, дүрбэн тэгшэ хүн байhан. Тэрэл жэлээ Агын нэгэдэхи дунда hургуулида ороо. Тэндэ ороод байхадаа, уран зохёолшо Жамьян Балданжабоной хүтэлбэрилдэг литературна кружогто үсɵɵхэн hарын туршада ябаа, тэрээнтэй хамта Доржи Эрдынеев ябалсадаг байhан. Хажуугаарнь тамирай секцидэ ябаха сагаа олодог байгаа. Санаар урилдаха, барилдаха, аймаг дотороо, Шэтын можын хэмжээндэшье шангай һууринуудта гарадаг һэн ха.
«Механизатор» гэжэ нэрэтэй тон түрүүшын шүлэгынь «Агын үнэн» газетэдэ 1954 ондо гараhан намтартай. Сахюурта нютагтаа 1961 ондо «Сахюурта» гэжэ гар бэшэгэй сэтгүүл гаргадаг уран зохёолой бүлгэм бии болголсоhон габьяатай. Мүнɵɵ hургуулиин музей соо энэ түүхэтэ сэтгүүлнүүдэй 6 дугаар нангинаар хадагалаатай, хүн зон хаража, ехэтэ hонирходог юм. Эдэ журналнууд соо толилогдоhон шүлэгүүдыень нэрлэхэ болоо hаа, «Постдо», «Магталсаан», «Тоосоошон», «Ойлго», «Аадар», «Механизатор», «Ветеринар» г.м.
Механизатор
Булад машинын жолоо баряад агсагагүй,
Булта шадаха болообди, хэмнайш арсахагүй.
Шэмэтэ газарайнгаа hахалта баялиг үрэhые
Шэдитэ машинаар хуряанабди үрдилдэн.
Доктортол адли доторынь задалаад машинынгаа,
Домножо аргалаад, саашалхаш ядамаргүй.
Долёобортоо домтой, эрхыдээ эмтэй
Документнүүднай дотор хармаандаа хадагалаатай.
2003 ондо Сахюуртын дунда hургуули дүүргэгшэ Данзан Дамбаев Батожаргал Шагдаров тухай реферат бэшэхэдээ, поэдтэй уулзажа хɵɵрэлдэhэн байна.
Дэлгэрэнгыгээр 3-дахи дугаарта.
