Декабрь һарада Ага нютагай мэдээжэ тамиршан, багша, һоригшо Дашинима Цыденов анда нүхэрэйнгѳѳ - Буряадай арадай уран зохёолшо Ардан Ангархаевай түрэһөөр 70 наһанайнь ойн баярта хабаадажа, нютагаа бусаа.
Тэдэнэр Буряадай гүрэнэй багшанарай институдай физикын ба тоо бодолгын факультедтэ суг хамта амжалтатай һуража түгэсхэһэн намтартай зон юм. Дашинима Цыденович иигэжэ хөөрэбэ: «Энэ уулзалгада Буряад ороной нютаг нютагуудай олон толгойлогшонор, дээдын засаг зургаануудай дарганар, уран зохёолшод, шүлэгшэд, эрдэмтэд, багшанар, оюутад, Түнхэн нютагайхидынь хабаадаа. Ардан Лопсонович нүхэрнай хүндэмүүшэ, даруу зантай, һайрхуу бэшэ хүн юм. Үнэндөө, тэрэнэй энэ наһандаа хэһэн ажал хэрэгыень дурдаха болоо һаа, аргагүй ехэ байдаг. Оюутан ябахадаа, бидэнэй староста байгаа, «Суранзан» гэжэ түрүүшынгээ туужа бэшэһыень һананаб.
Ардан Ангархаев уран зохёолой ба эрдэм шэнжэлэлгын таряалан дээрэ 70 гаран ном бэшэһэн, филологиин эрдэмүүдэй кандидадай ба түүхын эрдэмүүдэй докторой нэрэ зэргэнүүдтэй. Буряад ороной соёлой хүгжэлтэдэ оруулһан аша габьяань үндэрөөр сэгнэгдэһэн. СССР-эй Дээдын Зүблэлэй депутадаар, Буряадай Уран зохёолшодой холбооной түрүүлэгшээр һунгагдаһан, “Буряад Үнэн” хэблэлэй ба газетын ажал ударидаһан. Иимэ нүхэртэй байһандаа бидэ, суг һураһан нүхэдынь, агынхид, омогорхожо ябадагбди».
Дашинима Цыденович “номоо бэшэжэ, бидэнээ баясуулжа ябыш даа” гэжэ Ардан нүхэртөө баярай үгэ хэлээд, залуу наһанайнгаа “Яблочко” хатар гүйсэдхэжэ хүхеэгээ.
Дэлгэрэнгыгээр 4-дэхи дугаарта.
