Гал улаан тахяа жэлэй эхиндэ Агын тойрог дотороо абьяас ажалаараа шалгарhан Шулуутай нютагай ара талын ажалай ветеран Максар Цыденова 90 наһанайнгаа ойн баяр угтаба.
Ажалай ветеран М.Цыденова (дундань).
Максар Цыденовна ехэл һонин намтартай, хуби заяатай хүн юм. Үхибүүн наһандаа үншэрхыешье үзэһэн. Һүрөөтэ дайн дажарай үедэ колхозой ажал хэлсэжэ, эдир наhандаа “1941-1945 онуудай Агууехэ Эсэгын дайнда габшагайгаар ажаллаhанай түлөө” гэһэн медаляар шагнагдаhан. Арбан долоо наhатай Максар басаган 1945 ондо түрэл колхоздоо малай тоо бүридхэгшөөр хүдэлөөд, 1946 ондо Замhын дээдэ фермэдэ һаалишанаар ажаллажа эхилhэн намтартай. Үнгэрһэн зуун жэлэй дала гаран онуудта хамтын ажахын “Булаг” гэһэн комсомол-залуушуулай һүнэй фермые ударидажа, үндэр дүнгүүдые туйлаһанайнгаа түлөө “Хүндэлэлэй тэмдэг” орденоор шагнагдаа бэлэй. Тэрэ 1942 онһоо хойшо түрэл Шулуутай нютагтаа таhалгаряагүй хүдэлжэ, хамтын ажалда бэеэ гамнангүй шармайгаа, ниитын хэрэгтэ эдэбхитэйгээр хабаадаа. Нютаг зондоо хүндэтэй, туһатай ябаха гээшэ дэмбэрэлтэй даа. Максар эгэшэдэ “Д.Дылгыровэй нэрэмжэтэ колхозой хүндэтэ колхозник” гэһэн нэрэ зэргэ олгогдоо hэн. Агын тойрогой Арадай депутадуудай зүблэлэй хоёр зарлалай депутат, КПСС-эй Агын тойрогой комитедэй гэшүүн, Агада үнгэргэгдэһэн коммунис партиин бүхы конференцинүүдэй делегат ябаһан. Мүнөөшье олоной хэрэгээр һонирходог, ном, газетэ уншадаг, уран бэшэлгэ хэхэ дуратай, аман зохёолой “Алтаргана” бүлгэмэй бэлигтэй гэшүүн байһан юм.
Дэлгэрэнгыгээр 5-дахи дугаарта.
