Ошоошо зун Улаан-Yдэ хотодо үнгэргэгдэhэн Бүгэдэ буряадай «Алтаргана» нааданай үедэ Хяагтын аймагай нэгэ түлөөлэгшэтэй уулзажа, ажал хэрэгээрнь hонирхоhон байнабди. Тэрэ хэн бэ гэхэдэ, «Толон» гэhэн үхибүүдэй хатарай жэшээтэ (образцово) ансамблиин ударидагша, Буряад Республикын соёлой габьяата хүдэлмэрилэгшэ, Агаhаа гарбалтай, талаан бэлигтэй хатаршан, багша, соёлшон Доржиханда Цыбикова байгаа.
Д.Цыбикова (баруун гарһаа), С.Дашиева "Алтаргана" нааданда.
Тэрэнэй хүмүүжэмэл, Буряадай гүрэнэй хүдөө ажахын академиин оюутан, 20 наhатай Саяна Дашиева Хяагтын аймагай арюун дангина боложо, Хитад, Монгол, Буряад оронуудhаа, Забайкалиин хизаарhаа, Эрхүүгэй можоhоо ба Агын тойрогhоо ерэhэн гоё hайхан басагадтай суг хамта тайзан дээрэ гаража, «Алтарганын» мүрысөөндэ хабаадаа, абьяас бэлигээ харуулжа, сугларагшадые баясуулаа. Дүршэлтэй соёлшон Доржиханда Дамдинжаповна буряад хатар, дуу, үндэhэн заншалаа шабидаа hайнаар заахын хажуугаар арадай ба мүнөө үеын хубсаhа нарин нягтаар оёжо үгөө бэлэй. Тэрэ бага наhанhаа оёдол, урлал хэхэ дуратай, улигтай ябаhан. Гүнэй нютагһаа гарбалтай Галсанай Бутид эжынь буряад дэгэл үхибүүдтээ оёдог байhан.
Эхэнэр хүнэй хуби заяан жэгтэй hонин, удхатай байна даа. Басаган үри хадамайнгаа уг үнэржүүлжэ, хотонииень дээшэнь үргэлсэхэ хубитай ха юм. Агын аймагай Баян Булаг нютагта тоонтотой, уян нугархай, налгай зантай Доржиханда басаган 1982 ондо Зүүн Сибириин гүрэнэй соёлой академиин хатарай таhаг түгэсхэжэ, Хяагтын аймагай Алтай нютагай барилдааша, хүдэр шамбай Сергей хүбүүнтэй танилсажа, хуби заяагаа ниилүүлhэн байна. Тэрэ сагhаа хойшо 35 жэл үнгэрөө, нютаг нугадаа хүндэтэй гэр бүлэ 3 үринэрые үндылгөө. Тангил ганса нүхэрынь, мэдээжэ тамиршан, hоригшо Сергей Цыбиков түрэл нютагтаа олон бэрхэ барилдаашадые хүмүүжүүлhэнэйнгээ түлөө «Буряад республикын тамирай габьяата хүдэлмэрилэгшэ» гэhэн нэрэ зэргэдэ хүртөө бшуу. Абаяа hажаажа, гартаа шүрбэhэтэй, барилдаанда дүрэтэй хоёр хүбүүдынь хибэс дээрэ илалтануудые туйлажа, «Россиин тамирай мастер» гэhэн зэргэнүүдтэй. Анатолий хүбүүниинь БГУ-гай физикэ-математикын факультедэй кафедрые даагшаар, бага хүбүүн Түмэниинь Хяагтын 4-дэхи дунда hургуулиин информатикын багшаар хүдэлдэг. Айлай ехэ басаган Туяна баhал багшын ажал шэлэhэн, Улаан-Үдэ хотодо ажаhуудаг.Тэдэнэр гэр бүлэтэй, хүгшэн, нагаса аба эжы Сергей ба Доржиханда Цыбиковтэн 3 аша зээнэртэй.
Дэлгэрэнгыгээр 9-дэхи дугаарта.
