Багшын ажалай ветеран, оюун бэлигтэй дуушан, арадай уран гартан Цыцык Рабдановагай зохёохы замда зорюулагдаhан «Сэдьхэлэйм аялга» гэhэн үдэшэ февраль һарада Ушарбай нютагта үнгэргэгдэбэ. Агын тойрогой соёлой, уран урлалай хүгжэлтэдэ ехэхэн хубитаяа оруулжа ябаhан хүдэлмэрилэгшэ дунда hургуулияа дүүргэhээр ба зохёохы замайнгаа 40 жэлэй ойнуудаа баяр ёhололой оршондо тэмдэглэhэн байна.

 

УРАН ТЭНГЭРИИН МҮШЭДҺѲѲ ЗАЯАТАЙ

 

Цыцык Батомункуевна 1960 ондо Зугаалай нютагта дэлдэгэр галзууд омогой Сэбээнэй Батомүнхын дууша хатарша, абьяас бэлигтэй ехэ бүлэдэ түрэhэн. Эсэгэнь ёhото алтан гартай дархан, зурагша байхаhаа гадуур hур харбалгаар Зугаалай нютагай түрүүшын «Мастер спорта СССР» гэhэн нэрэ зэргэдэ хүртэhэн мэргэн баатарнуудай нэгэн байhан намтартай. Батомүнхын Дулмажаб эжынь дагаанхан галзууд омогой, мүн лэ «альганай зэргын торгоор арбан захатые бүтээхэ» аргатай гэдэг тусгаар уран гартай, оньhо шадабаритай гээд суурхадаг hэн ха. Yшѳѳ аба эжы хоёрынь хоюулан ирагуу hайхан хоолойтой дуушад, бэлигтэй хатаршад байhан. Зугаалай нютагай уран hайханай харалга наадануудай эдэбхитэй гэшүүдэй дунда Хабаровск хотодо үнгэргэгдэhэн арадай дуу хатарай Алас Дурнын зонын мүрысѳѳнүүдтэ хабаадаад, түрүүшын hуури эзэлжэ бусаhан габьяатай.

Батомүнхэ ахатан нютаг зонойнгоо, үхибүүдэйнгээ зүрхэ сэдьхэлдэ «ялас» гэмэ hайхан дурсалгануудые үлѳѳhэн. Уран Тэнгэриин мүшэдhѳѳ заяатай гэртэхинэй үхибүүдынь нялха нарайhаа эжынгээ hүмбээтэй, үлгын дуунтай уран урлалай, аялга хүгжэмэй үзэсхэлэнтэ мэдэрэлнүүдые зүрхэ сэдьхэлдээ нэбтэрүүлhэн гэжэ эли. Мүнѳѳ тэдэнэр булта уг гарбалайнгаа дамжуулhан оюун бэлигые дам саашань бадараажа, урлаха, зураха, оёхо, дуулаха талаар амжалтануудаараа суутай.

Бүлын 12 үхибүүдэй эгээл эгэшэнь болохо Цыцык Батомункуевна Зугаалайн дунда hургуулиин наймадахи класс дүүргэhэнэй удаа Сретенскын багшанарай училищиин художественно-графическа таhагта hуража, 1979 ондо түгэсхэhэн. Түрэл Зугаалайнгаа дунда hургуулида черчениин ба зурагай багшаар хүдэлжэ эхилээд, удаань 1982 онhоо Ушарбайн hургуулида эхин шатын багшаар ороhон намтартай.

 

Дэлгэрэнгыгээр 10-дахи дугаарта.

You have no rights to post comments