Согто-Хангил нютагта тоонтотой ажалай ветеранууд Батожаргал ба Цыпелма Батоболотовтон гэр бүлэ болоһоор тэбхэр 50 жэлэйнгээ ойн баяр тэмдэглээ.
Тойрогой Захиргаанай хүтэлбэрилэгшэ Буянто Батомункуев жаргалтай бүлые тэбхэр ойгоорнь амаршалжа, баярай бэшэг барюулһан байна. Батожаргал Жамсаранович ба Цыпелма Намсараевна наһанайнгаа олон жэл түрэл нютагтаа, ажахыдаа ажаллаһан намтартай.
Батожаргал Батоболотов «Согто-Хангил» ажахын түрүүлэгшээр олон жэлдэ ажаллажа, энэ ажахын хүгжэлтэдэ горитойхон хубитаяа оруулһан гээшэ. Тэрэ тойрогой хүдөө ажахын габьяата хүдэлмэрилэгшэ, Шэтын можын АПК-гай габьяата хүдэлмэрилэгшэ юм. Алдарта ойгоорнь Согто-Хангил нютагай захиргаан, депутадуудай Зүблэл, хамтын ажахын хүтэлбэри амаршалһан байна. Мүн үри хүүгэдынь, аша зээнэрынь аба эжыгээ амаршалжа, үреэлэй һайхан үгэнүүдые дамжуулаа.
Эрдэни ЧИМИТДОРЖИЕВ.
