Ага-Хангил нютагай, сагаангууд угай, ажалай ветеран Дансаран Лубсанов эдир залуу наһанһаа “Победа” хамтын ажахыда cүлөөгүй ажаллаһан, нютаг нугадаа хүндэтэй, түни түбшэн, бодолтой хүн юм. Тойрог, аймаг дотор тэрэниие танихагүй хүн үсөөн байха.
Далан долоодохи наһандаа хүнгэн дорюун зандаа ябаһан Дансаран Лубсанович түрэл колхоздоо ахамад мэргэжэлтэнээр хүдэлжэ, хамтын мал нилээд арьбажуулалсаһан, олоной хэрэгтэ хам оролсон, хүдөөгэй зүблэлэй түрүүлэгшээршье хүдэлөө, арадай һунгамалшье байһан. Наһанай амаралтада гарахадаа, Ага-Хангил нютагай буддын шажантанай бүлгэм ударидажа, хэдэн шүтөөнэй газарнуудые һэргээлсээ.
Дансаран аха Хулинда нютагай Ринчинэй Лубсанай үргэмэл ганса хүбүүн болоно. Түрэһөөр түрэл гаралынь олон ааб даа. Альган дээрээ үргэһэн эжынь - Норжомын Цыбаанжид, колхозой фермэдэ һаалишанаар хүдэлһэн. Лубсан аба тухайнь «1942 ондо Эсэгын дайнда татагдажа, 1944 ондо Польшодо алдалан унаһан» гэжэ сэрэгшэдэй дурасхаалта ном соо бэшээтэй. Мүн Дансаран Лубсанович үргэмэл нэгэ абжаатай байһан. Сэндэмэ абжаагайнь наһанай нүхэр - Цыдендамбын Һасаран, Могойтын аймагай засагай газарта мүнгэн зөөриин таһагые даагшаар бүхэли наһаараа ажаллаһан.
Дансаран хүбүүн 1947 ондо Үльдиргын эхин шатын һургуулида ороо. Дамдинжаб Табхаевич багшынгаа Дондог Эри уулын ара хажууда оршодог Ага-Хангилай һургуулида эльгээгдэхэдэнь, Болот Лубсанов, Доржи Юндунов, Цымжидма Данцаранова, Дарижаб Цыбенов, Цымжидма Балданова, Галина Лхамацыренова ба бэшэшье нүхэдтэеэ тиишээ ошожо, байрада байгаад, 4-дэхи анги дүүргээ бэлэй.
«Бидэ,10-аад наһатай үхибүүд, 1950 оной зун уулын арада пионерскэ лагерьта байгаабди. Мүнөө байһан сээнтэрэй хойно, Оодой хүндын адагта хуhануудые зоогоод, ехэ найр, бүхэ барилдаан, мори урилдаан болоо hэн. Ехээр эдеэ шанаа. Дүрбэн тээһээ 4 колхозой түрүүлэгшэнэр түрүүтэй 4 тэбхэр жагсаал суглараа һэн. Агын тойрогой гүйсэдхэхы хорооной дарга Намсарай Бадмажабэ суглаанда үгэ хэлээ. Иигэжэ Чкаловай, Молотовой нэрэмжэтэ, «Мартын Найман» ба «Августын Нэгэн» гэһэн 4 колхоз ниилэхэдээ, «Победа» гэһэн томо колхоз байгуулагдаа», - гэжэ аха захатан дурсана.
Дэлгэрэнгыгээр 15-дахи дугаарта.
