Сэлеэнэй урда гүбээгэй оройн харгыгаар ябаган хүн бии болобо. Дүтэлхэдөө, уһан сэрэгэй зунай хубсаһатай, гартаа чемодан бариһан Сэндэмэ абгайн ехэ хүбүүн Цырен мүн.
   Түрүүшынхеэ уһан сэрэгэй хубсаһатай залуухан хүбүүе хаража, хубсаһыень гоёшооһоноо мартадаггүйб...
   Сэндэмэ абгайн үлбэр бэеын шалтагаанаар Цырен уялгата уһан сэрэгэй албанһаа урид табигдаһан гэжэ һанагшаб. Эжынь – Түгмидэй Сэндэмэ. Түгнэ сагаан. Тэрэ холын сагта Унаганай Мухууе дахажа, Хориин Түгнэ нютагһаа аяар холын Ага зөөһэн зоной үри һадаһадай нэгэн. Нютаг ороноо шэнжэлэгшэ Виктор Цыбеновэй хөөрэһөөр, Сэндэмэ абгай «титулярна советник», капитан Унаганай Мухуугай аша басаган гү, ашынь басаган байжа магад.
Сэндэмэ абгай гурбан хүүгэдтэй байһан: Цырен, Цыпелма, Сэсэг. Минии мэдэхын Сэндэмэ абгай нютагтаа ходо хара ажалда ябаа. Һүүлэй жэлнүүдтэ үе мүсэнь үбдэжэ зобоогшо бэлэй. Минии гэртэхинэй хониндо ябахада, Цыпелма басагантаяа малай түрэлгын үедэ хамһалсаха...
   Үльдиргын голой адагай баруун бэедэ – абатанай зуһалан, голой зүүн бэедэ – залуу хонишон Бальжирай Батоцырентэн.
   Тээ хойгуур, голой зүүн талада, «Мартын 8» колхозой сээнтэрэй бууса багаар «Победа» колхозой үхэрэй фермэ байһан. Сэндэмэ абгай тэндэ байгаа.
   Зун байгаа гэжэ һананаб. Нэгэтэ аба эжы хоёр Сэндэмэ абгайн урилгаар Цырен хүбүүнэйнь түрэдэ ошоо бэлэй. Аба, эжын хөөрэлдэһөөр, ёстой хүдөөгэй, зугаатай, гоё түрэ болоһон. Сагаан-Шулуутай нютагһаа нэгэ хэды машинаар урагууд басага хүргэжэ ерээ һэн ха.
   Тиихэдэ Цырен Шэтын техникумдэ һуража гү, али тэрэнээ дүүргэжэ ябаа. Тон тодорхойгоор һананагүйб, мартааб. Һургуулияа дүүргэжэ, нютагтаа бригадираар ажаллажа эхилээ.
   Маанадай һургуулиин һурагша ябахада, Хилгэндэдэ, Үльдиргын хүндын адагаар Түгнэ сагаангууд һуурижаһан байна. Тэдээн соо урагшаа һанаатай, олониитын ажалда эдэбхитэй хабаададаг, олоной түлөө оролдодог залуу хүбүүд – Дашицырен Занданов Цырен Нимбуев хоёр байһан ха. Эдэ хоёр нютагтаа комсомолой ударидагшад (секретарь) ябаһан. Дашицырен аха саашадаа намай шугамаар аяар холын Үлирэнгын тала (Приаргунский район) эльгээгдэхэ...
   Цыдендоржи ЖАМСАРАНОВ,
   нютаг ороноо шэнжэлэгшэ.
АГА-УЛААН-ҮДЭ.

You have no rights to post comments