Ажал хэжэ үндыһэн
Батомунко Пурбуевич 1929 ондо Агын Буряадай тойрогой Зугаалай нютагта түрэһэн намтартай. Багаһаа һонюуша, нэгэ юумэ зохёохо, зураха дуратай, һүбэлгэн үндыһэн. Эндэһээ уламжалхада, бурханһаа үршөөлтэй бэлигтэй хүбүүн түрэһэн гэжэ тобшолхоор байна. Батомунко ахын аба Ринчинэй Еши ламын һахилтай байгаа. СССР гүрэнэй түүхэдэ эгээл хүндэ хүшэр, аймшагтай, хамалган хашалганай үе мартагдашагүйгөөр хадуугданхай. Шажан мүргэл хорюултай, дасан дугануудай һандаржа байһан үедэ Еши лама Красноярскын хизаар шадар сүлүүлһэн байна. Батомунко аха хойто абатаяа үндыхэдөө, нэрыень нэрлүүлхэ, угыень үргэлжэлүүлхэ хүбүүн болоһон. Тэрэ багаһаа ажалда бэрхэ байһан. Эсэгын дайнай үедэ, һүүлээрхишье жэлнүүдтэ ажал хэжэ үндыһэн. Улаан Армида алба хэһэнэйнгээ һүүлээр 1952 оной намар Улаан-Үдэ хото ажал хэхэеэ ошоһон байна.
Дүй дүршэл олоһон
Сэтгүүлшэн Бэлигма Орбодоевагай драматург Батомунко Пурбуевай 80 наһанай ойн баярта зорюулжа найруулһан зураглал 2009 оной сентябриин 10-да «Буряад үнэн» газетын нюурта хэблэгдэһэн байна. Тэндэһээ хэһэг: «...Улаан-Үдэ ямар нэгэн ажалда орохоо ерээ һэнби. «Юу хэжэ шадахабши?» – гэжэ Бата Баторов танилни намһаа асуубал даа. Тиихэдэнь: «Багаһаа зураха дуратайб», - гэбэб. «Буряад-Монголой драмтеатрай уран зураашада шаби хэрэгтэй...». Иигэжэ Батомунко Пурбуевич түрүүшынхеэ Улаан-Үдэ хотодо ажалда ороһоноо хөөрэһэн байдаг. Тэрэнэй ажалда орожо байха үедэ Буряад-Монголой драмтеатрай захиралаар Цырен Аюрзанаевич Балбаров, режиссёроор Цырен Галзутович Шагжин гэгшэд хүдэлжэ байһан ха. Тэрэ сагта тайзанай шэмэг хэхэ, афиша бэшэхэ, мэдээсэлнүүдые тарааха ажал Буряад Республикын арадай уран зурааша Борис Булгатович Чернутов ябуулжа байгаа. Батомунко Пурбуевич ажалда орохоо ерэхэдээ, утаа гаража байһан һэеы гэрэй, хазаартай мориной, дасануудые ба тала дайда зураһан зурагуудаа харуулһан байна. Энэ гурбан зурагыень хараад, «харыт, уран шэмэглэлэй эскизүүдые зураад асарбал» гэлдэһэн ха. Тиигэжэ Серовой нэрэмжэтэ клуб соо оршодог театрта хүдэлхөө ороһон байна. Аяар 1952 онһоо эхилжэ Батомунко Пурбуевич буряад театртай нягта холбоотой болоһон.
(Үргэлжэлэлынь 18-дахи дугаарта).
Валентина ЦЫРЕНЖАПОВА.
