Могойтын аймагай Ага-Хангил нютагта ажаhуудаг Дашинимаев Эрдэнижаб Болотова Дарима хоёрой гэр бүлэ болоhоор, тэбхэр 50 жэл болобо. Аба эжын нангин уялга дүүрэн дүүргээд, мүнөө хүүгэдээрээ омогорхон, зээнэрээ дутуугүй дүүрэн жаргал эдлэхэ зон болоhой гэжэ зальбаржа, хүмүүжүүлхы хубитаяа оруулалсажа байдаг. Мэнэ-мэнэхэн хүүгэдээ эрьеэд, илангаяа амаралтын үедэ бултыень тойруулжа, «Энэл хадаа манай жаргал» гэжэ энэрхы сэдьхэлээрээ эльбэн эрхэлүүлжэ байдагынь сэгнэшэгүй.
   Зунай дулаахан үдэр – Орос Уласай үдэр – Дүшын Цырендоржын Дашинимын Эрдэнижабтанай гэртэ хүрэжэ ерэбэбди. Хорёогойнь үүдэ татажа ороходо, аятай зохид оршон байдал угтана. Аляа бишыхан Адиса басаган эзэн ёhоор урдаhаамнай гаража, «Мэндээ» гэжэ уhан буряадаар мэндэшэлээд, «Эжымни эндэ ажал хэжэ байна» гэжэ зааха юм. Энэ хадаа эгээ одхон зээ басаганиинь болоно.
   Зүб даа, амаралтын үдэр ажалшье түлэг дундаа. Долгорма, Баира басагадынь янза бүриин ургамалнуудые hуулгана, харин эжынь Дарима Дагбаевна ехэл анхаралтайгаар адаглана. Тээ тэндэhээ хажуурай таршаганаан дуулдана, зээ хүбүүд Цырен Даши хоёр ээлжэлэн ногоо сабшана, нагаса абань – Эрдэнижаб аха хүбүүдтээ туhатай зүбшэлнүүдые заабарилна. Харин багашуул Аягма, Аюр, Адиса мүн лэ ажалайнгаа забhарта теннис, волейболшье наадана, футболой бүмбэгэшье намнана, баскетболойшье бүмбэгэ наяраад лэ, корзина руу орошоно.
   Хүүгэдэйнгээ багаhаа дүршэхыень нагаса абань хоер гасуугай хоорондо ооhор дүтэ-дүтэ татажа, волейболой сеткэ зохёогоо, баскетболой щит, футболой бартаа тодхоо, теннисэй стол табяа. Удангүй ехэ басаганиинь Долгорма халуун сай барихыемнай дурадхаба.

You have no rights to post comments