«Энэ хэмжээ ябуулга Үбэр Байгалай хизаарай Экономическа хүгжэлтын яаманай 2021 оной шэнэ программын туhаламжаар бэелүүлэгдэбэ. Тус программын гол зорилго – аяншалга хүгжөөлгэдэ туhаламжа юм. Шэтэ хотодо «ТурАкселератор» гэжэ гурбан hарын hуралсалай программада хабар хабаадажа, проектнүүдые бэлдээ һэмди. Тиигээд 206 түhөө түсэбэй 24-дэнь хабаадажа, 500 мянган түхэригэй грантда хүртэhэн байнабди. Агын Буряадай тойрогой Захиргаан, Буряад соёл хүгжөөлгын түб, Дулдаргын аймагай захиргаан хамтаржа, энэ фестиваль үнгэргэжэ байна», - гэжэ гол эмхидхэгшэ, үмсын хэрэг эрхилэгшэ Аюр Болотович Дондоков хөөрэбэ.
Уран гартайшуул модоор саадай-паркын дүрсэ хүрэгүүдые урлажа мүрысэhэн байна. Гурбан регионһоо дүй дүршэлтэй, суутай зургаан hиилүүршэд уригдаа юм: Буряад Республикаhаа Александр Будаев, Буянто Ошоров, Анатолий Цыденов, Хакасиhаа Виктор Кызласов, Yбэр Байгалай хизаарhаа Дондок Юндунов ба Будажап Жигжитов хабаадаа. Бэшэшье регионhоо олон уран гартайшуул ерэхэ аад, коронавирусай һүжэрһэн шалтагаанаар ерэжэ шадаагүй. Жюридэ мэдээжэ архитекторнүүд Тумэн Цыденжапович Цыденжапов ба Болот Базаржапович Дондоков, арадай уран гартан Балто Базаргуруевич Батожаргалов ажаллажа, hиилүүршэдэй хэhэн дүрсэнүүдые хаража, мэргэжэл шадабариинь, буддын шажанай сэдэбэй ба буряад үндэһэн һиилэлгын талаар сэгнэжэ, шангуудые олгоо юм.
40 мянган түхэриг шантай түрүү hуури Александр Будаев эзэлээ, хоёрдохи hуурида (30 мянган түхэригэй шан) Будажап Жигжитов гараа, гурбадахи hуурида Виктор Кызласов хүртэhэн байна. Һиилүүршэдэй хэһэн дүрсэнүүд паркын шэмэг боложо үлөө.
Фестивалиин хэмжээндэ Агын тойрогой уран гартанай бүтээлнүүдэй үзэсхэлэн дэлгээгдээ, элдэб янзын - буддын шажанда, буряад үндэhэн соёлдо хабаатай дүрсэнүүд, зурагууд табигдаа, тэдэниие худалдажа абахада болохо байгаа.
Жюридэ, уран гартанда болон үзэсхэлэн дэлгээхэ майхангууд табигдаһан байна. Холо ойрын аяншалагшад тус хэмжээ ябуулгаар ехэтэ hонирхоо бшуу.
Цымжидма ДОЛГОРОВА.
