Агын тойрогой Түлѳѳлэгшэдэй суглаанай ээлжээтэ зүблѳѳн нүүдэл маягаар Хойто-Ага һууринда ноябриин 23-да эмхидхэгдээ.
Үмсын хамһабариин ажахынуудай хүгжэлтэдэ түлхисэ хэрэгтэй.
Түлѳѳлэгшэдэй суглаанай түрүүлэгшэ Цырен Цыреновэй хүтэлбэри доро үнгэргэгдэһэн зүблѳѳн дээрэ Агын аймагай хүдѳѳ ажахын байдал ба хүгжэлтынь замууд тухай гол асуудал зүбшэн харагдаа. Нэн түрүүн Хойто-Агын захиргаанай толгойлогшо Цыпелма Базаржапова нютагайнгаа эмхи зургаануудай ажаябуулга тухай мэдээсээ. Тэрэнэй тэмдэглэһээр, үмсын малда сабшалан дуталдадаг байна. Удаань зүблѳѳндэ хабаадагшад нютагай соёлой байшанай, музейн, номой сангай, тамирай байшанай, фельдшерско-акушерскэ пунктын, дунда һургуулиин, түймэр саралгын албанай, ТОС-уудай ажалтай танилсаа.
Гол элидхэл Агын аймагай захиргаанай хүдѳѳ ажахын хорооной түрүүлэгшэ Владимир Намжилов хэһэн байна. Аймаг дотор 10 хамтын ажахы, 5 хүдѳѳ ажахын эд хэрэглэгшэдэй кооператив (СПК), 87 таряашанай-фермерскэ ажахы (КФХ), 4200 гаран үмсын хамһабариин ажахы (ЛПХ), 13 хүдѳѳ ажахын эд хэрэглэгшэдэй урьһаламжын кооператив (СПКК) болон 3 болбосоруулгын үйлэдбэри тоологдоно. Аймагай 5 ажахы үүлтэртэ мал үсхэбэрилхэ тусхай саарһатай. Элидхэгшын тэмдэглэһээр, бүхыдѳѳ ажахынуудта үбһэ бэлэдхэлгын түсэб 94 хуби дүүргэгдээ, түсэблэһэнһѳѳ 54 хуби таряанай хүрэнгэ хуряагдаа. Хүдѳѳ ажахынгаа үйлэдбэри худалдаһанай ашаар хамтын ажахынууд 41 сая түхэриг олзолһон байна, энэнь нёдондонойхиһоо ехэ мүнгэн болоно. Аймагай хүдѳѳ ажахын һалбарида гүрэнһѳѳ дэмжэлтэ үзүүлэгдэжэ, энэ жэлэй эхинһээ 70 сая түхэриг, тэрэ тоодо 50 сая түхэриг федеральна бюджедһээ һомологдоһон байна. Энэ мүнгэнэй 29,5 сая түхэриг таряашанай-фермерскэ ажахынуудта хубаагдаа. Хүдѳѳ ажахын эд хэрэглэгшэдэй урьһаламжын 13 кооперативта бүхыдѳѳ 1095 гэшүүд тоологдоно. Тэдээндэ 5 сая түхэригэй урьһаламжын мүнгэн үгтѳѳ, энэнь нёдондонойхиһоо халта ехэ болоно. Октябриин 25-ай байдалаар, Агын мяханай комбинадта 529 үхэр, 337 хонин, 50 адуун промышленна аргаар гаргагдаа. Жэшээлхэдэ, Хойто-Ага һууринһаа оройдоол 2 үхэр мяханай комбинадта тушаагдаһан байна. “Агинское молоко” эмхидэ хубилалтанууд болоно, һү буйлуулдаг цехэй хэрэгсэлнүүд Базар Батоевой фермерскэ ажахыда дамжуулагдажа, бууса дээрэ фермэ түхеэрэлгын ехэ хэмжээнэй ажалнууд ябуулагдана.
Зүблѳѳндэ хабаадагшадай тэмдэглэһээр, хүдѳѳ ажахыда туйлалтануудай, гүрэнэй дэмжэлтын байгаашье һаань, хүгжэлтэдэнь һаад ушаруулха шалтагууд олон. Хүдѳѳ ажахынхидай һү мяхаяа, талха таряагаа тушаажа, мүнгэн болгохо замуудынь гуримшуулагдаагүй. Мэргэжэлтэд дуталдана, бага салинһаань боложо, залуушуулые хүдѳѳ ажахыда тогтоохонь орёо.
Хүдѳѳ ажахын үйлэдбэрилгэ эрьелтэтэй (полный цикл воспроизводства) байха ёһотой. Үйлэдбэрилгэ, буйлуулга, хадагалалга, худалдалга – эдэ бүгэдэ нягта холбоотой байбал, хүдѳѳ ажахын хүгжэлтэ тухай хѳѳрэлдэхѳѳр болохо.
Дэлгэрэнгыгээр 48-дахи дугаарта.
