Тойрогой толгойлогшонорой Зүбшэлгын зүблэлэй ээлжээтэ нүүдэл зүблѳѳн декабриин 2-то Тугшан һууринда үнгэргэгдѳѳ.
Тугшанай захиргаанай толгойлогшо Н. Данзанова экскурси хэнэ.
Тэрэниие Агын Буряадай тойрогой Захиргаанай хүтэлбэрилэгшэ Бато Доржиев хүтэлѳѳ.
Тойрогой Захиргаанай мэргэжэлтэд федеральна албангуудай түлѳѳлэгшэдтэй суг саг үргэлжэ хүдѳѳ һуурингуудта гаража, нютагай захиргаанай хүдэлмэрилэгшэдтэ методическа болон бодото ажалай туһаламжа үзүүлдэг заншалтай. Энэ ажаябуулгын үрэ дүнгүүд тухай тойрогой Захиргаанай нютагаа ѳѳһэдѳѳ хүтэлэлгын зургаануудтай харилсаанай таһагай дарга Тимур Батожапов мэдээсэбэ. Тэрэнэй тэмдэглэһээр, бюджет тухай хуули ба тогтоолнуудта, нютагай засаг баригшадай олзо оршо, эд зѳѳри тухайгаа мэдээнүүдые үгэлгэдэ гол түлэб алдуунууд хэгдэдэг байна. Нютаг бүхэндэ ажаһуугшадай суглаанууд үнгэргэгдэнэ, зүгѳѳр эдэ суглаануудта тон үсѳѳн зон ерэнэ. Тиимэһээ ниитэ ажал ветерануудай болон залуушуулай зүблэлнүүдтэй хамта эршэмтэйгээр ябуулха хэрэгтэй гээд хэлэгдээ.
Хүдѳѳ ажахыда хэрэглэмжын газарнуудые хинаха тухай Забайкалиин хизаараар болон Амарай можоор Россельхознадзорой хүтэлбэриин аймагууд хоорондын 1-дэхи таһагай дарга Борис Аюров элидхэхэдээ, хуули хазагайруулгын 46 ушар элирүүлэгдэһэн байна гээд хэлэбэ. Иимэ ушарнуудай дабтагдахагүйн тула газарай участок бүхэнэй хилэнь хизаарлаатай, гүрэнэй бүридхэлдэ оруулагдаһан байха ёһотой.
Удаань тойрогой хотын ба хүдѳѳ һуурингуудта тамир ба физическэ культура хүгжѳѳхэ талаар ямар ажал ябуулагданаб гэжэ тойрогой Захиргаанай тамир болон соёл хүгжѳѳлгын таһагай дарга Булат Бальжинимаев хѳѳрѳѳ. Бүхыдѳѳ тойрог дотор 174 һоригшод ажаллана. Тэдэнэй 53-иинь барилдаагаар, 32 - һур харбалгаар, 12 – столой теннисээр, 24 - волейболоор, 9 - шатараар г.м һорино. Һуурин бүхэндэ тамирай хэмжээ ябуулгануудай литэ гуримшуулха, ажалай ветерануудтай, залуушуултай, эрэмдэг зонтой ажал энэ литэ соогоо түсэблэхэ ёһотой гээд хэлэгдээ. Мүрысѳѳ эмхидхэлгынгээ дүй дүршэл жэлһээ жэлдэ дээшэнь үргэхын тула үнгэргэһэн хэмжээ ябуулгануудайнгаа протокол, сценари нарин нягтаар хадагалха хэрэгтэй гээд мүн лэ тэмдэглэгдэбэ. Тиин декабриин 17-18-да Могойто тосхондо бильярдаар можонуудай хоорондо 5-дахи турнир үнгэргэдэхэ гэжэ соносхогдоо.
Зѳѳриин, унаагай налогуудаа олон ажаһуугшад саг соогоо түлэнэгүй гэжэ Забайкалиин хизаараар налог татабариин албанай 1-дэхи инспекциин дарга Любовь Ширибазарова мэдүүлээд, налогой үри шэри нэхэхэ талаар түсэбтэеэ толгойлогшонорые танилсуулаа.
Тойрогой дэбисхэр дээрэ гэр байрын-коммунальна ажахы хүгжѳѳлгын хүндүүлхэй асуудалнууд тухай тойрогой Захиргаанай территори хүгжѳѳлгын таһагай ахамад мэргэжэлтэн Туяна Цырендашиева элидхэһэн байна.
Зүблѳѳнэй түгэсхэлдэ толгойлогшонор Тугшан нютагай нэгэ ТОС-ой хүүгэдэй наадаха талмайтай болон тамирай байшанай, музейн, номой сангай, дасанай ажаябуулгатай танилсаа.
Дэлгэрэнгыгээр 49-дэхи дугаарта.
