Декабриин 29-дэ Могойтын аймагай Ага-Хангил нютагта бүхэ барилдаагаар уласхоорондын тамирай мастерай нэрэ зэргэдэ хүртэһэн Балдан Цыжиповые ёһолон хүндэлбэ.
Б.Цыжипов аба эжытэеэ.
Тайзан дээрэ Балдантай суг аба эжынь - Мижитдоржи Балданович ба Ирина Владимировна, түрүүшын һоригшодынь - А.Жугдуров, Б.Бадмаев уригдаһан байнад. 2016 он Балданда ехэ үрэ дүнтэй, амжалтатай байгаа. Красноярск хотодо үнгэрһэн Дмитрий Миндиашвилиин академиин шангай бүхэроссиин турнирай абарга болоо һэн шуу. Монгол орондо эмхидхэгдэдэг «Mongolian Open-2016» уласхоорондын турнирта илаа. Якутск хотодо үнгэргэгдэһэн Дмитрий Коркиной уласхоорондын гра-при шүүһэн байна. Кемеровэ хотодо болодог заншалта турнирта баһал түрүүлээ бшуу. Тиихэдэ Буряад республикын Президентын Кубогай уласхоорондын мүрысөөндэ хоёрдохи һуурида гараа һэн. Красноярск хотодо эмхидхэгдэһэн гран-при «Иван Ярыгин» ба Баку хотодо үнгэргэгдэһэн Голден гран-при «Мемориал Гейдара Алиева» мүрысөөнүүдтэ гурбадахи һуури эзэлээ бшуу.
Иимэ үндэр амжалтануудаарнь Балданиие нютагайхид, айлшад амаршалаад, ерээдүйдэ Олимпиин наадануудай алтан медальда хүртэхыень хүсөө юм. Һургуулиин үхибүүд сугларагшадта аялга һайхан дуунуудые, хатар наада бэлэглэһэн байна.
Дэлгэрэнгыгээр 1-2-дохи дугаарта.
