Шэнэ жэлэй эхиндэ, гал улаан эрэ тахяагай донгодоогоор, дээдын хэшэгэй hүлдэтэй баялигай амhарта ѳѳрын гараар хэжэ, «дундагүй дүүрэн, дутуугүй хүсэд» байдалтай hуугты!
Урдын сагhаа Энэдхэг, Хитад, Түбэд г.м. зүүн гүрэнүүдэй арадууд элүүр энхэ, үри хүүгэдтэй, эд зѳѳреэр элбэг, ажал хэрэгэйнгээ урагшатай, амжалтатай, ажаhуудалдаа аза талаан, зол жаргал бадараахын тулада баялиг татадаг тусхай хэрэгсэл бүтээдэг байhан. Түбэдтэ тэрэнь «Янгуг» - «баялиг татадаг эрдэнитэ амhарта» гээд нэрлэгдэдэг. Досоонь 
«Мендуб ба Рильбу» - «Баялигай үрилнүүд» гэжэ хоморой нангин ехэ олон зүйлнүүдые алтантай холижо бүтээhэн сэнтэй зүйлнүүд, 5 янзын таряан, эрдэнитэ зүйлнүүд, бурхадай дүрсэнүүд, тусхай маани тарнинууд, ургамалнууд, үнэтэ шулуунуудай зүйлнүүд, адис, санзай, хоргой торгоной үртэһэнүүд г.м. орожо, тусхай бүтээлнүүдэй ёhоор бүглэгдэдэг. Заабол номин ба шүрэ шулуунууд байха ёhотой ха. Yшѳѳ Ринчен гэhэн ба бусад түбэд эмнэлгын эмүүдые хэбэл, ехэ hайн гэжэ хэлэгдэнэ. Бүхѳѳр хабхаглагдаhан ба табан үнгын хадагай үнгэтэй бүдѳѳр хушагдаhан эрдэнитэ амhарта бурханай хажууда, хүнэй нюдэнhѳѳ далда, далгын hомонтой хамта ехэ наринаар хадагалагдадаг гуримтай. Бусад зондо hайрхажа, харуулжа, хабхагыень нээжэ, задалжа огто болохогүй. Тиибэл хүсэниинь hаладаг гэжэ тэмдэглэгдэнэ.
Манай нютагуудаар Бумба гээд нэрлэгдэдэг тэрэ баялигай эрдэнитэ зүйл мүнѳѳ дэлхэйн бүхы зоной анхарал татадаг болонхой. Россида, жэшээнь, ямаршье яhанай, шажанай, эрдэмтэй, тушаалтай олон хүнүүд тиимэ Бумба гэртээ байлгахые зоридог. Европодо элдэб янзын семинарнууд, хэшээлнүүд үнгэргэгдэжэ, Бумбын ёhото эди шэдитэ хүсэн тушаа элидхэгдэдэг, hургаал, зүбшэлнүүд дэлгэрдэг болонхой. Буддын шажанай урдын заншалаар бүтээгдэдэг Бумбые дүүрэнээр зохёожо хэхэнь бэрхэтэй hэн тула мүнѳѳ түбэдэй Са Че, хитадай Фэн-Шуй гэhэн hургаалнуудай ёhоор тэдэниие ѳѳрын гараар хэхэ тухай зүбшэлнүүд дэлгэрэнхэй. Мүн лэ үгырэлhѳѳ абаржа, үри хүүгэдэй, ажал хэрэгэй талаар хүнэй байдал hайжаруулдаг гайхамшагта арга боломжонууд тухай тэмдэглэгдэдэг.
Дэлгэрэнгыгээр 4-дэхи дугаарта.
