2002-2004 онуудта музейн хоёр дабхартай байшан баригдажа, 2005 оной февраль hарада ашаглалгада тушаагдаа. Шэнэ байшан Россиин Федерациин Архитекторнүүдэй холбооной гэшүүн Мунко-Жаргал Дылгыржаповай түлэблэлөөр баригдаhан гээшэ.
Мүнөө музейн мэргэжэлтэд түүхын хуудаhа иража, баримтата фильм буулгаhан байна, тэрэнээ олондо дурадхаа. Мүн тиихэдэ «Музей - сокровищница Аги» гэhэн ном хэблэгдээ.
Сенатор Баир Жамсуев үгэ абахадаа: «…Жигжитжаб Доржиевые аха захатан мэдэхэ байха, 30 жэлэй хугасаа соо музей ударидажа, музейн хүгжэлтэдэ горитойхон хубитаяа оруулhан хүн. Энэ хүнэй хэhэн ажал сэгнэшэгүй ехэ юм…» - гэжэ онсо тэмдэглээд, музейн мэргэжэлтэдые ойн баяраарнь амаршалаа.
Агын Буряадай тойрогой Түлөөлэгшэдэй суглаанай түрүүлэгшэ Цырен Цыренов: «Гомбожаб Цыбиковэй нэрэмжэтэ Агын үндэhэтэнэй музей Үбэр Байгалай хизаарай болон Агын Буряадай тойрогой дэбисхэр дээрэхи бүхы музейнүүдэй түб гэхэдэ, алдуу бэшэ. Музейн мэргэжэлтэдэй ашаар зон түүхэеэ, ёhо заншалаа мэдэхэ болоно», - гээд тэмдэглээ.
Мүнөөдэрэй байдалаар, музейн мэргэжэлтэд хэдэн шэглэлээр бэдэрэлгын болон эрдэмэй, шэнжэлэлгын ажал ябуулдаг. Музейн экспонадуудай, эндэ бүридхэгдэhэн баримтануудай hургуулиин үхибүүдтэ, мүн бүдүүн зондо хэрэгтэй боложол байдагынь эли.
Валентина ЦЫРЕНЖАПОВА.
