Мартын 4-дэ олохон һуурингуудай, тэрэ тоодо Будаланай ажаһуугшад Сагаалганай һайндэр тэмдэглэһэн байха юм.
1969 оной тахяа жэлтэн кавказска хатар гүйсэдхэнэ.
Будаланай соёлой байшан соо гурбан үеын тахяа жэлтэн - 1957, 1969, 1981 онойхид һайн бэлэдхэлтэйгээр наада гаргаба. Али алинииньшье дууша, хатарша, наадаша байһанаа гэршэлбэ. Жаран жэлээ угтажа байһан жэлтэн гансаараа, хоёроороо, бүһэтэйшүүл ба эхэнэрнүүд бүлэгѳѳрѳѳшье элдэб дуунуудые - «Жаран жэлэй заяан байха», «Түрэһэн нютаг», попурри, «Түрүүшын дуран» г.м. ирагуу гоёор дуулаа. Мүн тэдэнэр мүнгэ ехээр татадаг үзэлшэ һамган ба тэрээндэ нюдэ балайгаар үнэншэһэн эхэнэр тухай «Үзэлшэ һамган» гэһэн зүжэг наада дурадхаһан, харагшадые энеэлгэһэн байна. Тахяа жэлээ оруулжа байһан жаран юһэн онойхид «Эжыдээ зорюулнаб», «Хоёр һайхан бурхантайб» г.м. дуунуудые дуулаа. Тиихэдэ «Одиночество вдвоём» номер, «Как курочка ряба замуж выходила» гэһэн баһал энеэдэтэй зүжэглэмэл наада харуулба. Москва, Шэтэ, бэшэшье нютаг һуурингуудта ажаһуужа байһан 1981 оной үетэн нүхэд түрүүн Сагаалганаар амаршалгатай видео-буулгабари дурадхаа. Һүүлээрнь дуу зэдэлүүлжэ, шүлэг хѳѳрэжэ, гоё һайханаар хатаржа, «Сагаалганай стол» гэһэн зүжэг дурадхажа, олоной альга ташалгада хүртѳѳ. Тэдэнэй табиһан концерт-наадан ехэхэн сагай үргэлжэлэлтэй, элдэб янзын хубсаһануудаараа, дуу хатараараа баян байгаа гэхэдэ, алдуугүй. Гадна тэдэнэр модельер Саяна Лхамацыреновагай хубсаһанай суглуулбаринуудые харуулжа, нюдэ хужарлуулаа, наадаяа шэмэглээ.
Бүхыдѳѳ тахяа жэлтэй али алишье онойхид харюусалгатайгаар, оролдосотойгоор хандаа, үри хүүгэдынь аба эжынэрээ дэмжэн хабаадалсаа, үетэн бүхэн аба эжынэрээ, багшанараа хадагаар золгожо, ерэхэ жэлдэ жэлээ оруулха дүү зондоо - нохой жэлтэндэ «эстафетэ» дамжуулжа, бэлэгүүдые барюулаа. Эдэ бүгэдэ тон һайшаалтай: булта эбтэй эетэй, гурим журамтай гэжэ тэмдэглэхээр.
Дэлгэрэнгыгээр 10-дахи дугаарта.
