Гол элидхэл хэһэн тойрогой Захиргаанай үндэһэн соёл хүгжөөлгын таһагай дарга Саяна Аюшиевагай тайлбарилһаар, тойрогой номой сан бүхэндэ ямар номууд эгээл эрилтэтэй байнаб, ямар авторнуудые зон уншанаб гэжэ саг үргэлжэ адаглажа байдаг. Иимэ адаглалтын дүнгөөр, хабар бүри «Ном – нангин баялиг» гэһэн тойрогой конкурс үнгэргэгдэжэ, эрилтэ ехэтэй номууд тодорхойлогдодог байна. Эндэһээ һабагшалан, буряад уран зохёол ехэ эрилтэтэй гэжэ тэмдэглэгдэбэ. Илангаяа хүүгэдэй уран зохёол хэрэгтэй. Элидхэгшын тобшолһоор, хүүгэдэй уран зохёол бэшэхэ авторнууд тойрог соо үгы. Ульгам буряад хэлэтэй зон нэгэн гэбэл публицистнууд, албан ёһоной хэлэн дээрэ бэшэдэг, үгы гэбэл, прозоор бэшэдэг авторнууд, харин хүүгэдэй ойлгохоор, абтасатайгаар бэшэхэ уран үгэтэн үгы ха.
Теэд ямаршье асуудалда шиидхэбэри олдодог еһотой. Жэшээнь, элитэ хүүгэдэй уран зохёолшо Цырен-Базар Бадмаевай зохёолнуудые шэнээр хэблэхээр бэшэ гү гэһэн дурадхал зүблэгшэд оруулаа. Энэ һонин дурадхал байна, хараадаа абахабди гэжэ засаг зургаанай түлөөлэгшэ найдуулба.
Буряадаар уншалга дэмжэхэ талаар хизаарай 14 аймагай 26 номой сантай ажал ябуулагдана гэжэ хэлэгдэбэ. Эдэ номой сангуудай хамтын хэдэн мянгаад номууд соо оройдоол 600-гаад буряад хэлэтэ номтой байхадань, арга хургаа оложо, 500-гаад ном тойрог дамжуулаа ха. Шэнэ номуудтай болоһон номой сангууд нютагайнгаа буряадуудые урижа, дамжуулагдаһан номуудтай танилсалга баярай оршондо эмхидхээ. Тиигэжэ Агын тойрогһоо гадуур ажаһуугшадай буряад ном уншаха аргатай болоһониинь һайшаалтай. Мүн Шэтэ хотын номой сангай буряад хэлэтэ номоор туһалхыень гуйхадань, Шэтын дасан соо буряад номой булан эмхидхэгдэжэ, тэндэнь 100 гаран ном суглуулагдаһан байха юм.
Тиихэдэ буряад хэлэтэ номуудай ехэ эрилтэтэй хадань тэдэниие электронно маягаар уншаха арга боломжо ямар гээшэб? Саяна Гармаевнагай тайлбарилһаар, буряад литературын классигуудай номууд бии. Теэд тэдэниие электронно түхэлдэ оруулхын түлөө томо, 5 сая түхэригэй сканер хэрэгтэй. Иимэ сканер абаха зорилготойгоор Ц.Жамцараногой нэрэмжэтэ номой сан гурбан жэл удаа дараалан грантнуудай конкурснуудта хабаадана, теэд, халаг, грантнууд оргтехника худалдан абалгые дэмжэхэгүй байна бшуу.
Дарима БАЗАРОВА.
