Мартын 4-дэ Шэтэ хотодо «Дангина-2017» гэһэн гоо һайхан басагадай жэл бүриин заншалта мүрысөөн үнгэрбэ.
Басагад наһанай хоёр бүлэгтэ хубааржа, томошуулай дунда найман басагад, эдиршүүлэй дунда дүрбэн басагад хабаадаа юм. Тэдэнэй бусадһаа ондоогоор өөрыгөө харуулха, буряад хэлэеэ, ёһо заншалнуудаа мэдэхэ, дуу, хатар гүйсэдхэхэ шадабаринуудынь сэгнэгдэһэн байна. Конкурсын дүнгүүдээр, томошуулай дундаһаа «Дангина-2017» нэрэ зэргэдэ Дулдаргын аймагай Зүдхэлиин Арюна Доржиева хүртөө бшуу. Тэрэ мүнөө Улаан-Үдын Зүүн Сибириин гүрэнэй соёлой, уран урлалай һургуулиин 3-дахи курсын оюутан юм.
"Эдир залуу дангина" нэрэ зэргэдэ хабаадагша басагад. Сарюна Балданова (зүүн гарһаа 2-дохи).
«Эдир залуу дангина» нэрэ Агын тойрогой гимнази-интернадай 6-дахи ангиин һурагша 12 наһатай Сарюна Балдановада олгогдоо юм. Тэрэ К.Базарсадаевай нэрэмжэтэ хүүгэдэй искусствын һургуулида дуунай, хатарай таһагта һурадаг, «Баяр» гэһэн хүүгэдэй хатарай ансамбльда ябадаг шуу.
Дэлгэрэнгыгээр 10-дахи дугаарта.
