Юумэ бэшэхэ, зохёохо гэһэн угаар дамжаһан бэлигтэй уран зохёолшо Дугаржап Жапхандаев олон шүлэг, рассказуудые ном болгожо, суглуулбаринуудые хэблүүлжэ, хэдэн үе зоной буряадаар уншаха, үзэхэ хэрэгтэ асари ехэ хубитаяа оруулһан гээшэ.
Шэтын можын, Агын тойрогой, хизаарай уран зохёолой түүхэдэ нэрээ мүнхэлһэн бэлигтэн тухай дурасхаалай үдэшые Цыбен Жамцараногой нэрэмжэтэ хизаарай, Алханын хүдөөгэй номой сангуудай мэргэжэлтэд эмхидхэһэн байха юм. Хизаарай номой сангай мэргэжэлтэд Дугаржап Жапхандаев тухай фильм олондо дурадхаа. Сугларагшадай анхаралда «Здесь край мой, исток мой, дорога моя…» гэһэн гаршагтай номой үзэсхэлэн дэлгээгдээ. Үзэсхэлэндэ дэлгээгдэһэн номуудһаа гадна Д.Жапхандаевай гар бэшэлгэнүүдые, ручкыень, архивай фото-зурагуудые, баярай бэшэгүүдые зон һонирхожо хараа бшуу. Алханын дунда һургуулиин һурагшад, «Малыш» сэсэрлигэй хүмүүжүүлэгшэд шүлэгүүдыень уншаһан байна. Д.Жапхандаевай зээ басаган Екатерина Доржиева үгэ абажа, дурасхаалта үдэшэ эмхидхэһэн зондо түрэлхидэй зүгһөө баярые хүргөөд, урмашуулгын бэшэгүүдые, бэлэгүүдые барюулһан байна.
Э.Доржиев.
