Засаг зургаануудай хүтэлбэрилэгшэд, мэргэжэлтэд нүүрһэнэй нөөсэ, байшангууд соохи дулаа шалгажа байгаа. Гол анхарал түлишын нөөсэдэ хандуулагдаа бшуу. Муниципальна байгуулалтанууд Уртын, Түгнын, Хара нуурай, Татаурай ба бусад шулуун нүүрһэнэй уурхайнуудһаа түлишөөр хангагдаа. Харюусалгата хаhын дүүрэмсээр, удаадахи хаhада бэлэдхэлэй ажалнууд эхилдэг гуримтай.
Ага тосхоной түбэй котельни соо ехэ заһабарилга хэгдэхэ. Редакциин архивай фото-зураг.
Мүнөө зундаа тойрогой хүдөө нютагуудай олон котельнинүүдтэ заhабарилгын хүдэлмэринүүд ябуулагдаха. Нэн түрүүн мэргэжэлтэд шалгалтануудые ябуулжа, соргонуудые хаража, хаанань заhабарилха хэрэгтэйб гэжэ элирүүлхэ болоно. Эдэ шалгалтануудай үедэ зарим байшангуудые халуун, хүйтэншье уhаар хангалга таhалдажа болохо гээд мэдээсэгдэнэ. Эгээл түрүүн Ага, Могойто, Шэнэ Орловск, Орловск тосхонгуудые хангадаг теплотрассанууд шалгагдаха юм. Удаань аймагуудай хүдөө нютагуудаар татагдаhан соргонууд шалгагдаха бшуу. Мэргэжэлтэдэй тайлбарилһаар, майн 31 болотор зарим социальна эмхинүүдэй байшангууд дулаагаар хангагдажа байха. Зунай эхиндэ тойрогой гурбан аймаг хизаарай Территори хүгжөөлгын яамантай зүбшэн хэлсэжэ, ТЭК ба ЖКХ-гай объектнүүдые заһабарилха талаар хэлсээ баталһан байха юм. Тэрэ хэлсээнэй ёһоор, Үбэр Байгалай хизаарай правительствын тогтоолоор, тойрогой гэр байрын болон коммунальна түхеэрэлтэнүүдые, котельни, соргонуудые заһабарилгада хизаарай бюджедһээ мүнгэн саг соогоо һомологдохо ушартай.
Үнгэрэгшэ үбэл тосхоной ба хүдөө нютагуудай котельнинүүдтэ хоёр долоон хоногто хүрэхэ шулуун нүүрһэн ходо буулгаатай байжа, байшангууд дулаагаар таһалгаряагүй хангагдаа бшуу. Үнгэрэгшэ үбэл тойрог дотор 114 котельни ашаглагдаа, тэдэнэй 41-иинь Могойтын аймагта тоологдоно. Тиихэдэ дулаагаар хангадаг 17 эмхи бии. Дулаасуулгын хаһада тойрогой котельнинүүд дунда зэргээр 100 мянган тонно түлишэ галдаа. Агын аймаг эгээл ехэ - 33 мянган тонно түлишэ ашаглана. Удаань Ага тосхон – 30 мянган тонно. Майн 20-ой байдалаар, тойрогой котельнинүүдтэ гурба мянга гаран тонно түлишэ хадагалаатай, энэ хадаа дулаасуулгын шэнэ хаһада 19 хоногто хүрэхэ нүүрһэн болоно...
...Дулаасуулгын хаһын дүүрэхэдэ, үнгэрэгшэ үбэл дулаагаар хангагдаһанай түлөө эмхи зургаануудта, ажаһуугшадта үри шэриеэ түлэхэнь шухала. Зунай сагта дулаагаар хангадаг эмхинүүд коммунальна хангалтануудай үри шэриеэ бусааха ажал үргэнөөр ябуулжа эхилэнхэй. Мүнөөдэрэй байдалаар, хэдэн сая гаран түхэригэй үри шэри тоологдоно гэжэ хэлэгдэнэ. Эндэ шэнгэн түлишын, налогой, зайн галай, салин түлэлгын г.м. үри шэри ороно.
Эрдэни ЧИМИТДОРЖИЕВ.
