2021 оной сентябриин 19-дэ – дуугаа үгэлгын ниитэ үдэртэ - Гүрэнэй Дүүмын 8-дахи зарлалай депутадуудай һунгалта үнгэргэхэ тухай указ Россиин Юрэнхылэгшэ Владимир Путин июниин 17-до гаргаа гээд Кремлиин пресс-албан мэдээсээ. Гүрэнэй Дүүмэдэ һунгалтатай зэргэ энэ үдэр 12 нютаг ороной толгойлогшонор болон 39 нютаг ороной хуули байгуулгын зургаануудай депутадууд һунгагдаха юм.
Хоёр хоноод, июниин 19-дэ Россиин Түб һунгуулиин комиссиин тогтоол гараһан байна. Тэрээн соо Гүрэнэй Дүүмэдэ депутадуудые һунгалтада болон сентябриин 19-дэ болохо бэшэшье һунгалтануудта дуугаа үгэлгэ гурбан үдэрэй туршада – сентябриин 17-һоо 19 болотор эмхидхэгдэхэ гэжэ тунхаглагдаба. Иимэ шиидхэбэридэнь гүрэн соохи санитарно-эпидемиологическа байдал, эрхэтэдэй энхэ элүүрэй аюулгүйе сахилга нүлөөлөө бшуу.
Тиимэһээ дуугаа үгэхэ нэмэлтэ арга боломжоёо хэрэглэжэ, тосхон һуурингуудһаа холо ажаһуудаг эрхэтэд сентябриин 17-до ба 18-да һунгаха аргатай байха.
Үбэр Байгалай хизаарай һунгуулиин комисси июниин 18-да политическэ намуудай түлөөлэгшэдтэй зүблөө үнгэргөө. Энэ зүблөөндэ хабаадагшадта Гүрэнэй Дүүмэдэ депутадуудые, хизаарай Хуули байгуулгын суглаанда нэгэ депутадые болон хэдэн муниципальна аймагай толгойлогшонорые ба депутадуудые һунгалтада ямар документнүүд бэлдэгдэхэ ёһотойб гэжэ тайлбарилагдаа.
