Мартын 11-дэ Агын аймагай соёлой байшан соо залуушуулай удаан хүлеэһэн тойрогой хэмжээнэй «Шаг вперёд» хатарай конкурсын финал үнгэрөө.
Гансаараа хатардаг долоон хүн (Versus, Диана Бальжинимаева, Тимур Дондоков, Бутит Содномова, Жамбал Дамбаев, Ангелина Цыремжитова, Билигто Дондоков), долоон бүлгэм (ADF, Madjaktiv, My way, Ninjaz Vibe, N.A.D.A, VGS, Maximum) ээлжэлээд, элдэб янзын шэглэлнүүдээр хатаржа, шадабарияа олондо харуулһан байна. Энэ түһөө түсэбэй гол эмхидхэгшэ Р.Гармажаповтай суг Венгридэ болоһон уласхоорондын хатарай конкурсын илагша Б.Базарова, «Амар сайн» дуу хатарай театрай артист З.Малханов хоёр хабаадагшадые сэгнээ юм.
ADF бүлгэмэй хатаршад.
Конкурс хүтэлэгшын «хатар таанадта юун бэ?» гэжэ һурахада, залуушуул: «хатар гээшэ манай ажамидарал, үнгэрһэн саг тухай тэмдэглэлнүүд, гэр бүлэ, хани нүхэсэл, инаг дуран» гэжэ харюусаа һэн. Жюриин дүн гаргахаа ошоходо, хабаадагшадай батл үнгэрөө. Нэгэ хүгжэм доро хоёр хатаршад гү, али хоёр бүлгэм бэе бэетэеэ мүрысэһэн байна.
Гансаараа хатарһан хабаадагшадай дунда «Mистер Dance» - Т.Дондоков, «Mисс Dance» - Д.Бальжинимаева болоо, «эгээл онсо өөрсэ хатар» шан А.Цыремжитовада барюулагдаа. Харин 1-дэхи һуурида Ж.Дамбаев гараа. Бүлгэмүүдэй хоорондо «эгээл сэдьхэл татама хатар» - VGS, «эгээл гоё хатар» - N.A.D.A, «эгээл онсо өөрсэ хатар» - «My way», «эгээл сэдьхэл хүдэлгэмэ хатар» - Mad-jaktiv болоо. Шангай 1-дэхи һуурида Агын багшанарай колледжын ADF бүлгэм гараһан байна. Батлда илаһан Б.Дондоков ба Ninjaz Vibe мүн лэ урмашуулагдаа.
Дэлгэрэнгыгээр 11-дэхи дугаарта.
