Эндэ hая хоёр үдэрэй туршада Агын Буряадай тойрогой залуушуулай XIII слёт онлайн аргаар эмхидхэгдээ.
Слёдой хэмжээндэ 150 залуушуул - хүдөө hууринай эдэбхитэд, наймаашад, багшанар, оюутад болон залуушуултай ажал ябуулдаг мэргэжэлтэд интернедэй талмайда суглараа. Үбэр Байгалай хизаарай Агын Буряадай тойрогой дэбисхэр дээрэ ажаhуудаг залуушуулай хоорондо урагшаа hанаатай, бэрхэ хүниие тодоруулха зорилготойгоор энэ хэмжээ ябуулга эмхидхэгдээ юм.
Хоёр үдэрэй туршада залуушуул түhөө түсэбүүдээ хамгаалаа. «Агинский Бурятский округ – территория успешного будущего» гэhэн янзада Агын аймагай 4 түлэблэл илажа, тус тустаа 50 мянган түхэригэй сертификадта хүртөө.
«Молодой фермер» гэhэн конкурсын дүнгөөр, түрүүшын hуурида Могойтын аграрно-промышленна техникумэй оюутан Павел Пивень хүртөө.
«Стратегический резерв села-2030» гэhэн конкурсдо түрүүшын hуурида Ага тосхоной можо, 2-дохидо – Дулдаргын аймагай, 3-дахи hуурида Могойтын аймагай залуушуул гараа.
«Лучший сельский специалист» гэhэн янзада Сагаан-Шулуутайн волонтёр, hоригшо Василий Цыбенов илаа. 2-дохи hуурида Алханын Сэржэна Содномова, 3-дахи hуурида Хойто-Агын Бутит Цыренова гараа.
«Лучшие практики по работе с волонтёрами» гэhэн конкурсдо Агын аймагай «Открытые сердца», Ага тосхоной «Доброволец СДР», Дулдаргын аймагай «Волонтёры-медики» гэhэн отрядуудай ажалнууд тэмдэглэгдээ.
