Буряад Уласай Үндэһэтэнэй номой сангай nbrb.ru сайт дээрэ «Редкие издания детской литературы на бурятском языке» гэһэн гаршагтай виртуальна үзэсхэлэн июлиин 2-то нээгдэбэ.
Эндэ Буряад-Монголой гүрэнэй хэблэлэй байшанай эртын, 1930-аад онуудай болон 1970-аадшье онуудай номууд дэлгээгдээд байна: «Гурбан баабгай» онтохон, К.Чуковскиин «Мойдодыр», В.Гюгогой «Козетта», Ж.Зиминэй «Гарай табан хурган» г.м.
1930-аад онуудай хүүгэдэй буряад уран зохёол гэхэдэ, гол түлэб, ородһоо оршуулганууд лэ байгаа. Эгээл тэрэ үедэ буряад бэшэгэй хэлэн хуушан монголһоо лата үзэгүүдтэ оронги һэн. Үзэсхэлэндэ дэлгээгдэһэн «Турлаагууд ба Миисгэй» («Turlaaguud ba Miisegei») гэһэн 1937 ондо лата үзэгүүдээр хэблэгдэһэн ном ехэ анхарал татана. Тэрэнэй автор - Владимир Каринский («Грачи и Кот»), буряад хэлэндэ Бавасан Доржиевич Абидуев оршуулаа. Зурагуудыень уран зурааша-карикатурист Константин Ротов хээ. Эдэ зурагуудһаань уламжалан, үзэсхэлэн бэлдэгшэд энэ номые совет үеын түрүүшын комикснуудай нэгэн болоно гэжэ тайлбарилна бшуу.
