Фестивалиин хэмжээндэ бүһэтэйшүүлэй хоорондо шатараар Россиин Кубогай шата үнгэргэгдөө. Россиин элдэб орон нютагай 57 шатаршад, тэдэнэй тоодо 6 гроссмейстернүүд мүрысөө. Үбэр Байгалай хизаарһаа ФИДЕ-гэй мастер Яна Жапова хабаадаһан байна.
   Мүрысөөндэ 5 оноо абажа, 16-дахи һуури эзэлһэн Яна Жапова эхэнэрнүүдэй дунда һайн дүн харуулаа. Яна энэ турнирта уласхоорондын гроссмейстерые түрүүшынхеэ илаа, турнирна таблицын дээгүүр байһан уласхоорондын мастертай болон уласхоорондын 3 гроссмейстернүүдтэй ана-мана тэмсээ, ФИДЕ-гэй мастерые шүүһэн байна. Иигэжэ рейтингээ 48,4 пунктаар дээшэлүүлээ.
   Үшөө 2021 оной бүхэроссиин «РАПИД Гран-При России» гэһэн шатада түргэн шатараар 2002 оной ба залуу наһанай басагадай хоорондо мүрысөөндэ 3-дахи һуури эзэлээ.
   «Яна Жапова шатараар июлиин 31-һээ августын 19 болотор үнгэргэгдэхэ «Radnickichess-2021» гэһэн уласхоорондын турнирта хабаадаха. Мүрысөөндэ уласхоорондын нормо дүүргэхэ аргатай. «Radnickichess-2019» турнирай илагша байхадань, Яные «Раднички» гэжэ Сербиин шатарай клуб уриһан байна», - гэжэ Шатарай федерациинхид хэлэнэ.
   Августын 26-һаа 31 болотор 14 наһа хүрэтэр басагадай хоорондо түргэн шатараар ФИДЕ-гэй дэлхэйн Кубогта Яна хабаадаха.
   Нордоп БАБУЕВА.

You have no rights to post comments