Тэрэ Москвагай Коммунарки хотодо оршодог 40-дэхи клиническэ больницын ахамад эмшэн, Россиин Энхэ элүүрые хамгаалгын яаманай штатна бэшэ реаниматолог-анестезиолог юм. Денис Проценкын ударидадаг больницада Covid-19 үбшэндэ нэрбэгдэһэн үбшэнтэниие аргалдаг Россида түрүүшын стационар нээгдэһэн байна.
Холын айлшантай уулзалгада сенатор Баир Жамсуев, тойрогой Захиргаанай хүтэлбэрилэгшэ Буянто Батомункуев гэгшэд хабаадаа. Эхиндэнь сенатор Баир Жамсуев тойрогой ажабайдал тухай тодорхойгоор хөөрэжэ, айлшаниие агынхидай байдалтай дүтөөр танилсуулаа.
Тойрог дотор һүжэрөөд байһан халдабарита үбшэнэй байдал, сентябрь һарада үнгэргэгдэхэ Гүрэнэй Дүүмэдэ депутадуудай һунгалта тушаа хөөрэлдөөн болоо. Эмшэнэй ерэһэн ушар элирхэйлхэдэ, тэрэ коронавирус үбшэнһөө аргалха дүршэлтэеэ нютагай эмшэдтэй хубаалдаа юм. Денис Проценко «Единая Россия» намһаа Гүрэнэй Дүүмын депутадта кандидат болонхой.
Денис Проценко Агын дасан хүрэжэ, лама санаартантай уулзаа, Согшон, Майдариин дугангууд руу орожо, шажанай гуламтануудые хараа. Эндэ Агын дасанай шэрээтэ Бадма Цыбиков, дид хамба Цырен Дондукбаев гэгшэд дасанай түүхэ, шажан мүргэл тухай хөөрэжэ үгөө.
Саашань айлшан тойрогой больница хүрэжэ, эмшэдтэй уулзаһан байна. Агын эмшэд коронавирус үбшэндэ нэрбэгдэһэн зониие хайшан гэжэ аргалхаар бэ гэжэ асуудалнуудые тайлбарилуулаа. Нютагай эмшэдэй мэдүүлһээр, халдабарита үбшэн ехээр һүжэржэ, олон хүн үбдөө, наһа бараһан зоной тоо үсөөн бэшэ. Эмшэд нилээд тэсэбэри, оролдолго харуулжа, зониие абарха ажалаа ябуулһаар. Ниитэ зоной һанаа зобоомо асуудалнуудай нэгэн гэхэдэ, эмшэд бага салинһаа боложо, ондоо нютагууд руу ажал бэдэржэ ошоно. Олон мэргэжэлээр эмшэд дуталдана. Хэрбэеэ олон эмшэд депутадууд болобол, энхэ элүүрые хамгаалха талаар программа абтабал, эмшэдые социальна талаар дэмжэхэ шиидхэбэри орохо юм. Айлшанай тэмдэглэһээр, дэлхэй дүүрэн һүжэрһэн COVID-19 үбшэнтэй тэмсэл манай гүрэндэ эршэмтэйгээр ябуулагдана. Түрүүшын долгин соогуур Уханиин Сovid-19 диилэнхидээ наһатай зониие дайраһан һаань, Энэдхэгһээ бии болоһон «дельта» гэһэн штамм залуу зондо хүндөөр хүрэнэ. Иимэ янзын коронавирустай зониие аргалхань хэсүү. Оршон сагта эгээл найдамтай арга – вакцинаци абаха хэрэгтэй. Тиимэһээ жэл бүри үбшэнһөө һэргылжэ, тарилга абажа байхань шухала. Денис Проценко иигэжэ хэлэнэ: «Олон хүн намһаа һурадаг, үбшэнэй 4-дэхи долгин ерэхэ гү? Би тиихэдэнь хэлэдэгби. Манда дүрбэдэхи, табадахи долгин хэрэггүй. Садаабди. Хүрөө».
Уулзалгын түгэсхэлдэ Д.Проценко эмшэдтэ баярые хүргөөд, ажалдань амжалта хүсөө. Удаань Агын больницын урда зохёогдожо байһан эмшэн Ирина Дугаровагай нэрэмжэтэ сэсэрлиг хараһан байна.
Эрдэни ЧИМИТДОРЖИЕВ.
