Ойн баярай хэмжээ ябуулгада тойрогой больницада хэдэн үедэ хүдэлһэн ветеранууд болон мүнөө хүдэлжэ байһан эмшэд, эмнэлгын сестранууд ба бусад зон соёлой байшанай танхимаар дүүрэн сугларһан байна. Хизаарай амбан захирагшын орлогшо Аягма Ванчикова, тойрогой Захиргаанай хүтэлбэрилэгшэ Буянто Батомункуев, Хуули байгуулгын Суглаанай түрүүлэгшэ Кон Ен Хва, хизаарай энхэ элүүрые хамгаалгын сайд Оксана Немакина ба бусад айлшад хабаадаа.
Нэн түрүүн тойрогой больницын ахамад врач Дамдин Ульзутуев үгэ абажа, эмнэлгын гуламтын байдал тушаа дэлгэрэнгы элидхэл хээ. Тэрэнэй тэмдэглэһээр, тойрогой больница хизаар ба хизаарһаа гадуур Алас Дурнын федеральна тойрогто түрүү зэргэдэ ябадаг эмнэлгын булан болоно. Ажаһуугшадые шанартайгаар аргалхын тула тойрогой эмшэд шэнэ онол аргануудые нэбтэрүүлжэ, дүй дүршэлөө дээшэлүүлдэг. Мүн гуламтынгаа материально-техническэ байдал һайжаруулһаар. Мүнөөдэрэй байдалаар, тойрогой больница түхэреэн сүүдхэдэ 121, үдэрэй халаанда 54 хүниие аргалха һууритай. Мүн тойрогой тосхон ба хүдөө һуурингуудаар ажаһуугшадые амбулаторна аргаар хангаха 830 һууритай бшуу. Больницын бүридэлдэ аргалгын, үбшэ элирүүлгын 34 эмхи, участково 1 больница, эмнэлгын 9 амбулатори, фельдшерско-акушерскэ 6 пункт тоологдоно. Дүн хамтадаа эмнэлгын гуламтануудаар 578 хүн, тэрэ тоодо 94 эмшэд, 268 эмнэлгын сестранууд, санитарнууд ажаллана. Больницын хүтэлбэри мэргэжэлтэ кадрнуудаар хангаха талаар ажал саг үргэлжэ ябуулдаг.
Бүлэг эмшэдтэ хүндэтэ нэрэ зэргэнүүд олгогдоо, баярай бэшэгүүд, шангууд барюулагдаа. Жэшээлбэл, тойрогой больницын ахамад врач Дамдин Ульзутуев, нюдэнэй эмшэн Надежда Галсаннамжилова, ахамад бухгалтер Даба Бадиева гэгшэдтэ Хуули байгуулгын Суглаанай зүгһөө «За вклад развитие Забайкальского края» гэһэн энгэрэй тэмдэг зүүлгэгдээ. Операционно таһагай сестра Дугарма Дашибалова Хуули байгуулгын Суглаанай зүгһөө Хүндэлэлэй грамотаар урмашуулагдаа. Тиихэдэ рентгенолог Нордоп Цыренова, нюдэнэй эмшэн Наталья Цыремпилова, ультразвуковой диагностико хэдэг Соёлма Жапова, травматолог-ортопед Батор Жамбалов, ахамад акушерка Баирма Дашидондокова, педиатриин таһагые даагша Антонина Далаева, нарайлалгын таһагые даагша Эржена Гомбоева гэгшэдтэ баярай бэшэгүүд барюулагдаа. Хизаарай Правительствын, тойрогой Захиргаанай зүгһөө зарим зондо шагналнууд барюулагдаа.
Хэмжээ ябуулгын үргэлжэлэлдэ тойрогой больницын ажалтадай бэлдэһэн концерт-наадан табигдаһан байна.
Эрдэни ЧИМИТДОРЖИЕВ.
