Зүүн зүгэй оронуудые шэнжэлэгшэ, хэлэ бэшэгэй эрдэмүүдэй доктор Цыбен Жамцаранодо хүшөө Агада бодхоогдобо.
Б.Жамсуев, Б.Батомункуев, Б.Болотов хүшөө нээбэ.
Цыбен Жамцараногой нэрэмжэтэ хизаарай номой сан шадар табигдаһан хүшөө нээлгын ёһололдо Агын тойрогой Захиргаанай хүтэлбэрилэгшэ Буянто Батомункуев, сенатор Баир Жамсуев, Үбэр Байгалай хизаарай амбан захирагшын орлогшо Аягма Ванчикова, Ц.Жамцараногой түрэлхид, нютагайхидынь г.м. хабаадаһан байнад.
- Энэ хүшөө бодхоолгодо бюджедэй нэгэшье солхооб ороогүй, арад зоной дэмжэлтээр лэ бүтэбэ. Ц.Жамцараногой нэрэмжэтэ номой сан 2020 ондо хизаарай амбан захирагшын грант – 500 мянган түхэриг шүүһэн байна. Тойрогоймнай зон, эмхи зургаанууд мүнгэ суглуулаа. Тиигэжэ сая хахад тухай түхэриг сугларһан байна, - гэжэ Буянто Балданжапович тэмдэглээ. - Энэ хүшөө бүгэдэ буряадуудта, илангаяа залуу зондо гэгээрэлэй, эрдэмэй үндэр туйлалтануудай һүлдэ тэмдэг болог лэ даа.
Хүшөөгэй түхэл дүрсыень Ородой Уласай хүндэтэ архитектор Болот Дондоков зохёогоо, харин барилгыень Улаан-Үдын «Лотос» бүлгэмэйхид (хүтэлбэрилэгшэнь - Болот Цыжипов) хэһэн байна.
- Цыбен Жамцарано - урдаа ортоогүй арадай аман зохёол суглуулагша байгаа, «Гэсэр» үльгэрэй эгээл урданай янза бэшэжэ абаһан, тэрээгээрнь дэлхэйн эрдэмтэд арадай аман зохёол шэнжэлнэ бшуу. Цыбен Жамцарано – буряадуудай автономи болон монголнуудай гүрэн түрэ байгуулалсаһан агууехэ гүрэнэй ба политическэ ажаябуулагша байгаа. Һаяын ерээдүйдэ тэрээнтэй суг ажал ябуулһан нүхэртэнь – ниитэ ажаябуулагша Базар Барадинда баһал иигэжэ олоороо оролдожо, хүшөө бодхоохо бэзэбди, - гээд Баир Жамсуев хэлэбэ.
Хүшөө нээлгын баярай хэмжээндэ «Цыбен Жамцарано (1881-1942) Избранные труды» гэһэн номтой танилсуулга болоо. Энэ ном Улаан-Үдын республиканска хэблэлдэ 500 хэһэгээр хэблэгдээ. Номой редактор – түүхын эрдэмүүдэй доктор, Түбэд, буддын шажан болон Монгол орон шэнжэлэлгын институдай сотрудник Цымжит Ванчикова. Энэ ном соо эрдэмтэнэй 11 ажал ороо, тэдэниие Ц.Жамцараногой нэрэмжэтэ номой сангай мэргэжэлтэд Улаан-Үдын, Томскын, Санкт-Петербургын номой сангуудай жасануудһаа суглуулһан байна. Оролто үгэ соонь Цыбен Жамцараногой дүтын түрэл, багшын ажалай ветеран Борлой Болотовой статья табигдаа. Борлой Гэнинович профессорэй түүхэ намтар тон һайнаар мэдэдэг, тодорхойгоор бэшэһэн хүн юм.
Б.Болотов.
Профессорэй тоонто нютагайхид - һүдэнтынхид олон байгаа. Нютагай захиргаанай толгойлогшо Жаргал Дагбаевай хэлэһээр, нютагай зон хоёр һарын туршада 630 мянган түхэриг суглуулһан байна.
Д.Бадараев, Ж.Дагбаев.
- Цыбен Жамцарано 80-яад жэлэй саана энэ наһанһаа ошоһон. Дэлхэйдэ мэдээжэ болоһон хүбүүмнай мүнөө нютагаа бусаба... - гэжэ эрдэмтэн Дамдин Бадараевай хэлэһэниинь онсо удхатай.
Дарима БАЗАРОВА.
Жалсан ЛУБСАНДАШИЕВАЙ фото-зурагууд.
