Ага тосхондо коронавирус үбшэ усадхажа ябаһаар наһа бараһан түргэн туһаламжын таһагые даагша Ирина Дугаровагай дурасхаалда сквер нээгдээ. Олониитын хүсөөр эмхидхэгдэһэн энэ сквер Агын тойрогой больницын урда зохёогдоо.
Сквер нээлгэдэ засаг зургаанай түлөөлэгшэд, түрэлхидынь, суг һураһан, суг хүдэлһэн нү-хэдынь хабаадаа.
Россиин Федерациин Юрэнхылэгшын тогтоолоор, Ирина Дугарова (наһа бараһан хойноо) Пироговой орденоор шагнагдаһан.
«Үбшэнтэй тэмсэһээр, ами наһаяа үгэһэн врачай дурасхаал мүнхэлһэн сквер агынхидай анхарал татаха, дуратай газарынь болохо гэжэ найданаб», - гэжэ Агын Буряадай тойрогой Захиргаанай хүтэлбэрилэгшэ Буянто Батомункуев тэмдэглээ.
«Ирина Дугарова мэргэжэлтэ уялгаяа дүүрэн дүүргэһэн врач болоно. Энэ сквер хүн зоной энхэ элүүрые хамгаалха баатарнууд байна гэжэ һануулжа байха һайхан газар болохо», - гэжэ сенатор Баир Жамсуев хэлээ.
Сквер соо дурасхаалта тэмдэг болон мемориальна самбар түхеэрэгдээ. Скверэй дунда бүхы эмшэдтэ зорюулагдаһан архитектурна бага хэмжээнэй бахана тодхогдоо, харгын захаар амарха зоно зохёогдоо юм.
Энэ скверэй эскиз архитектор, Россиин Архитекторнүүдэй холбооной гэшүүн, Агын Буряадай автономито тойрогой габьяата барилгашан Тумэн Цыденжапов бүтээһэн байна.
Нордоп БАБУЕВА.
