Ара Аргалида «Кочевник» этнобаза нээгдэжэ, тэндэ «Хорхог – агинская баранина на камнях» гэhэн фестиваль үнгэрэгшэ бимба гарагта үргэн дэлисэтэйгээр эмхидхэгдээ.
Хэмжээ ябуулга нээлгын эхиндэ «Амар сайн» театрай артистнар хөөмэйн дуу зэдэлүүлээ.
Удаань тайзан дээрэ Агын тойрогой Захиргаанай хүтэлбэрилэгшэ Буянто Батомункуев, сенатор Баир Жамсуев, хизаарай амбан захирагшын орлогшо Аягма Ванчикова, Үбэр Байгалай хизаарай экономическа хүгжэлтын министр Александр Бардалеев, олзын хэрэг эрхилэгшэ, «Кочевник» этнобазын эзэн Бато Цыренжапов гэгшэд уригдаа.
«Бато Цыренжапов энэ түлэблэл үнгэрэгшэ жэл зохёогоо бэлэй. Мүнөө жэл түлэблэлөө бэелүүлжэ шадаа. Энэ фестиваль жэл бүхэндэ эмхидхэгдэхээр хараалагдана. Аймагуудай хоорондо үнгэргэгдэхэ конкурс «ТурАкселератор 2021 Забайкалье» гэhэн түhөө түсэбэй хэмжээндэ эмхидхэгдэнэ, Экономическа хүгжэлтын яаман энэ фестиваль дэмжээ юм», - гэжэ Буянто Батомункуев тэмдэглээ hэн.
«Олзын хэрэг эрхилдэг Бато Цырендоржиевичта болон урагшаа hанаатай бэшэшье зондо засаг зургаануудай дэмжэлтэ үгэжэ байхань шухала», - гэжэ Баир Жамсуев хэлээ.
Александр Бардалеев үгэ абахадаа, иигэжэ хэлэбэ: «Агын тойрогто үйлэдбэрилэгдэhэн зүйлнүүд ямаршье экономическа хэмжээ ябуулгада ехэ эрилтэтэй байдаг. Тиимэhээ хүдөө ажахыда ажал ябуулдаг зондо туhалха уялгатайбди».
Тус фестивальда гурбан аймагhаа болон Ага тосхонhоо нэгэ-нэгэ бүлэ можо болгогдожо табигдаа. Можо бүхэн өөр өөрын онсо хубсаhатай, галда түлеэ нэмэжэ байха туhалагшатай байгаа, хони гаргаха, гэдэhэ аршаха болон стол шэмэглэхэ түхеэрэлтэнүүдээ абаад ерээ. Хабаадагшадай гол зорилгонь - түргэн саг соо хони гаргаха, эдеэ шанаха, хорхог буйлуулха. Буряад арадай ёhо заншалаар, можо бүхэн гэдэhэ доторһоонь нэгэшье зүйл үлөөнгүй, бултыень эдеэн болгоо.
Жюриин гаргаhан дүнгөөр, Дулдаргын аймаг түлөөлhэн Аюр ба Цыцыгма Цыдендоржиевтан эгээл түргэн, шадамар бэрхээр хони гаргажа, гэдэhыень сэбэрээр, ёhо руунь аршаад, амтатай хорхог буйлуулжа, түрүү hуури эзэлбэ. Илагшадта «Кочевник» баазын эзэн Бато Цыренжапов хони, «афганский казан» гэжэ 20 литрэй тогоо бэлэглээ, дамжуулгын кубок барюулаа.
Цыдендоржиевтан.
Хоёрдохи hуурида Могойтын аймагай Ага-Хангил нютагайхид Дарма Ринчинов ба Цыцыгма Батоева гараа.
Ринчиновтэн.
Гурбадахида – Ага тосхоной Жаргал ба Саянэ Жалсандоржиевтан хүртөө.
Жалсандоржиевтан.
Агын аймагай түлөөлэгшэд - Хүнхэрэй фермернүүд Амгалан ба Билигма Дармаевтан дүрбэдэхи hуури эзэлээ.
Дармаевтан.
Хажуугаарнь hур харбалга, hээр шаалга эмхидхэгдээ. Бууза хумилгаар, шагай нааданай, нооhо даралгаар мастер-классууд үнгэргэгдөө. Өөрын гараар бүтээhэн ажалнуудай үзэсхэлэн дэлгээгдээ.
Хэмжээ ябуулгануудай забһарлалда Россиин ДОСААФ-ай Шэтын авиа-клубай Денис Рысцов ба Денис Пименов гэгшэд 1000 метр үндэрhөө парашюдаар hүрэжэ, олониие һонирхуулаа.
Валентина ЦЫРЕНЖАПОВА.
Авторай фото-зурагууд.
