Октябриин 2-то «Кочевник» этнобаза дээрэ үнгэргэгдэһэн Хорхогой нааданай хэмжээндэ харбаашад эбэр номонуудайнгаа хүбшэ татажа, эгээл мэргэнүүдээ элирүүлээ.
Агын Буряадай тойрогой харбаашадһаа гадна Буряад оронһоо хэдэн тамиршад ерэжэ, бүхыдөө 106 харбаашад хаба шадалаа туршаһан байна. Эдэ олон хабаадагшадай һур харбалга эртэ үглөөнһөө эхилээд, үдэшэ орой болотор үргэлжэлөө. Хизаарай эбэр номоор харбаашадай эмхи байгуулагшадай нэгэн, мэдээжэ һур харбагша Дарижаб Баясхалановагай ударидалга доро бүлэг шүүгшэд мүрысөөнэй дүнгүүдые татаа.
Шанга тулалдаанай эсэстэ бүһэтэйшүүлэй дунда түрүүшын һуури Догойн Дугаржаб Жаргалов эзэлээ. Шангай удаадахи һууринуудта сагаан-шулуутайнхид Насакдоржи Аюрзанаев Балдандоржи Батомункуев хоёр хүртөө, Согто-Хангилай Арсалан Дармаев дүрбэдэхи болоо.
Бүһэтэйшүүлэй дунда илагшад.
Эхэнэрнүүдэй дунда Амидхаашын Марина Тучинова эгээл мэргэн байба. Тэрэнэй удаа Агын Арюна Ринчинцынгеева, Улаан-Үдын Сэсэг Доржиева, Зугаалайн Ханда Полутова гэгшэд һубаряа.
Эхэнэрнүүдэй дунда илагшад.
Ветерануудай хоорондо Улаан-Үдын Цырендоржи Магаков эрхимлэбэ. Хэжэнгын Николай Егоров 2-дохи, Зүдхэлиин Дамдинцырен Гармаев 3-дахи, Урда-Агын Насан Намсараев 4-дэхи болоһон байнад.
Ветерануудай дунда илагшад.
Дарима БАЗАРОВА.
Дарижаб БАЯСХАЛАНОВАГАЙ фото-зурагууд.
