Агын дасанай 210 жэлдэ зорюулагдаһан уриилдаанда тойрогой хамтын ажахынууд, мори һоридог мэдээжэ фермернүүд, үмсын хамһабариин ажахы ябуулдаг зон гүйгөөшэдөө табиба. Морид соо илалтаараа холо ойгуур суурхаһан хүлэгүүдшье бии. Тойрогһоо гадуур үмсын ажахынуудта үсхэбэрилэгдэдэг морид табигдажа, мүрысөө шэмэглэһэн байна. Жэшээлхэдэ, Шэтэ хотоһоо Владимир Забелин олон мори асараа. Тэрэ Шэтэ хото шадар моридые һоридог, үсхэбэрилдэг конюшни барижа байна. Тэндэнь гүйгөөшэдые һорихо шодоогууд, һоригшод ажаллана.
Заншалта ёһоор, урилдаанда Могойтын аймагай Кировэй нэрэмжэтэ, «Догой», «Победа», Агын аймагай «Будалан» ажахынууд, Агын конюшни г.м. моридоо мүрысөөндэ хабаадуулаа. Мори урилдаанай олон зайда Агын «Дэшен Һундублинг» дасан шангуудые тогтооһон байна.
Ипподромой нэгэ дүхэригтэ 1600 метр зайда 2 наһатай азарга морид гүйлдэбэ. Шулуутайһаа ерэһэн Вавилон азарга унаһан шодоог Рабдан Цыденов фиништэ түрүүн гүйлгэжэ ерээ. Тиигэжэ эзэнээ Ж-Б.Жанабазаровые хүхеэбэ. Тэрээндэ ахигдаһан Шандалиин Стравинский (шодоогынь - Цыдып Батоев) 2-дохи ерээ. Агын конюшниин шодоог Цыдып Жамсаранов Джафар хүлэгөө хэды шабхадабашье, 3-дахи ерэһэн байна.
Энэл зайда холимол үүлтэрэй, хоёр наһатай гүүнүүд урилдаанда табигдаа. Шулуутайн «Аргал» ажахын Глэдис (шодоогынь - Рабдан Цыденов) түрүүлжэ ерээ. Агын конюшниин Джэфэрика (шодоогынь - Цыдып Жамсаранов), Догойн Принцесса Юга (шодоогынь - Нурба Домбрылов) удаадахи һууринуудта гараа.
Сэбэр үүлтэрэй 2 наһатай гүүнүүдэй 1600 метрэй урилдаанда «Победа» ажахын Табрис мори унаһан Содном Биликтуев урилдаанай урда заха барижа түрүүлээ. Табрисай удаа «Аргал» ажахын Галка хүлэг (шодоогынь - Зоригто Батомункуев), Ага-Хангилай Элайбрери (шодоогынь - Рабдан Цыденов) фиништэ ерээ.
Суута гүйгөөшэ Шаргын шанда хүртэхын түлөө Үбэр Байгалай хизаарта түрэһэн, 1 метр 38 сантиметрһээ үндэр бэшэ гүйгөөшэд 3200 м урилдажа, Догойн хоёр хүлэг: Дүрөө Хээр (шодоогынь - Алдар Удаев) болон Шара Гүүн (шодоогынь - Нурба Домбрылов) фиништэ һубарин ерээ. Шулуутайн «Аргал» ажахын Хас Тамга (шодоогынь - Зоригто Батомункуев) 3-дахи һуури эзэлээ.
1200 метрэй зайда «Спринтерский» шанда хүртэхын түлөө сэбэр үүлтэрэй гунан, хизаалан морид урилдаа. Эндэ «Победа» ажахын Джайн Бэнд (шодогынь - Содном Биликтуев) түрүүлжэ, соло дуудалгада хүртэһэн байна. Удаань Шандалиин Т.Жамбалдоржиевай Хрусталин (шодоогынь - Цыдып Батоев), «Аргал» ажахын Акс Лайн (шодоогынь - Рабдан Цыденов) гүйлгэлдэжэ ерээ.
2000 метрэй зайда хизаарта түрэһэн хизаалан, үреэ, шү-дэлэн морид табигдаа. Түрүүшын дүхэригтэ Шэтэһээ ерэһэн морин урилдаанай урда заха баряад ябаһан аад, удаадахи дүхэригтэ эсэжэ, бэшэндээ ахигдажа эхилээ. Агын конюшниин Киара, Догойн Галимхан, Хара-Шэбэрэй Насула хүлэгүүд айлшан мори холо орхижо, фиништэ һубарин ерээ. Гүйгөөшэдые унаһан шодоогууд - Александр Жигжитов, Нурба Домбрылов, Алдар Удаев шангуудта хүртөө.
2400 метрэй зайда эмээлтэй морид хатараа. Урилдаанда эмээлтэй хатарша моридые харахада гоё даа. Эндэ оройдоол хоёр морин урилдаа. Тиин «Догой» ажахын шодоог Доржи Жалсараевай унаһан Теффи 2,21 секунда соо фиништэ ерээ. Тэрэнэй удаа «Победа» ажахын хатарша Карусель (шодоогынь - Очир Пагмаев) финиш гаталаа.
Дааган морид 2000 метртэ урилдаа. Догойн хара зээрдэ Харсага гүйгөөшэ стартһаа эхилжэ, урилдаанай урда заха барижа, нэгэшье мори урдаа табингүй, фиништэ 1-дэхи ерээ бшуу. Догойн зон нютагайнгаа моридой түрүүлһэндэ ехэ баярлаа, хүхилдөө бэлэй. Шулуутайн Форсаж (шодоогынь - Зоригто Цыренжапов) 2-дохи, Кировэй нэрэмжэтэ ажахын Легион (шодоогынь - Зоригто Цыденжапов) 3-дахи ерээ.
4800 метртэ 1,40 сантиметр үндэртэй, буряад үүлтэрэй морид табигдаа. Энэ зай «Аргал» ажахын Сагаан Дали (шодоогынь - Зоригто Батомункуев) табан минута арбан хоёр секунда соо дабажа, түрүүн ерээ. Сагаан Дали хүлэгэй һүүлээр нютагай морин Шуурган (шодоогынь - Зоригто Цыренжапов), Зугаалайн Сэсэн (шодоогынь - Аламжи Банзаракцаев) һубариһан байгаа.
Удаадахи 1800 метрэй зайда хизаалан, үреэ, һоёолон, шүдэлэн морид хурданаа элирүүлээ. Энэ зайда хамта 4 морин урилдажа, түрүүшын хоёр һуури Шулуутайн гүйгөөшэд эзэлээ. Тодорхойлходо, Сабурган хээр азаргаар шодоог Рабдан Цыденов эрхимлээ. «Аргал» ажахын Комбинация зээрдэ гүү унаһан Зоригто Цыренжапов 2-дохи болоо. Эдэ хүлэгүүдтэ Т.Жамбалдоржиевай Халк зээрдэ азарга (шодоог - Цыдып Батоев) ахигдаа.
Мүрысөөнэй эгээл ута 8000 метрэй зайда холимол үүлтэрэй шүдэлэн, хизаалан морид урилдаа. Эндэ Шулуутайн Добряк азарга стартһаа эхилээд, бэшэ моридоо холо орхижо түрүүлһэн байна. Добрягые унаһан шодоог амаршалгада хүртөө. Ага-Хангилай Сахилгаан (шодоог - Бато Пагмаев), «Аргал» ажахын Мэндэ Амар (шодоог - Зоригто Цыренжапов) холохон зайда үлэжэ, удаадахи ерэбэд.
Гурба наһанһаа дээшэ шүдэлэн, һоёолон, хизаалан морид 3200 метрэй зайда табигдаһан байна. Үндэр бэетэй, ута хүлтэй морид энэ зай эсэнгүй гаталаа. Догойн Франкель хээр азарга (шодоогынь - Алдар Удаев) түрүүлжэ, соло дуудагдаа. Тэрэнэй удаа Могойтын аймагай Кировэй нэрэмжэтэ ажахын Форвард (шодоогынь - Зоригто Цыден-жапов), «Аргалай» Гранат азарга (шодоогынь - Рабдан Цыденов) ерэһэн байха юм.
Агын тойрогой Захиргаанай тогтооһон «Ехэ шанда» хүртэхын түлөө морид 2400 метртэ урилдаа. Эгээл шухала зайда Агын тойрогто түрэһэн шүдэлэн, хизаалан, һоёолон морид гүйлдэжэ, Шандалиин гүйгөөшэ Московский клад (шодоогынь - Цыдып Батоев) түрүүлээ. Ехэ шанда хүртэһэн мориндо соло дуудагдаа, хүмэлдэргэ үмдэхүүлэгдээ. Тэрээндэ ахигдаһан Шэтын Владимир Забелинэй үмсын морин Тактичный (шодоогынь - Сергей Старицын), Агын конюшниин Рио Вайзер морин, (шодоогынь - Цыдып Жамсаранов) гэгшэд 2-дохи, 3-дахи ерээ бшуу.
Эрдэни ЧИМИТДОРЖИЕВ.
