Мэдээжэ хүтэлбэрилэгшэ, СССР-эй Верховно Зүблэлэй гурбан зарлалай депутат ябаһан Бадма Цыренович Цыреновэй нэрэ тойрогой хүгжэлтын сагуудтай нягта холбоотой. Энээн тухай, Б.Ц.Цыреновэй 1960-1975 онуудта Агын тойрогой социально-экономическа хүгжэлтэдэ оруулһан хубитыень тодорхойлһон элидхэлнүүд олон байгаа. Жэшээлбэл, Ц.Жамцараногой нэрэмжэтэ номой сангайхидай элидхэл соо Бадма Цыреновэй үгэ хэлэхэнь элихэнээр дуулдаа. Шандалиинхид болон согто-хангилайхид Б.Цыреновые һайн таниха, мэдэхэ зоной видео-дурсалгануудые бэлдээ, Агын эрхим хүбүүн тухай Дагба Ринчиновэй дуун болон Рабдан Рабжуевай шүлэг зэдэлээ.
Жэл бүри ноябрь һарада Бадма Цыреновэй дурасхаалай шанда хүртэхын түлөө тойрогой можонуудай хоорондо бүхэ барилдаагаар мүрысөөн үнгэргэгдэдэг бэлэй. Энэ мүрысөөн тэбхэр 20 жэлэй саана эхи абажа, Агын аймагай можо 13 дахин илагшадай солодо хүртэһэн габьяатай. Мүнөө жэл ковид үбшэнэй дэлгэрһэн шалтагаанаар заншалта мүрысөөн болобогүй. Зүгөөр тамиршад энэ конференцидэ бэлдэн, ажалайнгаа зарим дүнгүүдые согсолхо аргатай байба. Аймаг бүхэндэ барилдаанай хүгжэлтын түүхэ харуулһан талмайнуудта дэлгээгдэһэн материалнууд тойрогой тамирай түүхын музейшье нээхээр үндэһэ һууринь болохоор гэжэ хабаадагшад тэмдэглээ.
Дарима БАЗАРОВА.
