Амбан захирагша гол анхаралаа аварийна гэрнүүдтэ хандуулаа. Түрүүн тиимэ гэртэ ажаhуудаг зонтой уулзажа, байдалыень хараа. Дулдарга hууринда аварийна гэртэ 22 айл ажаhуудаг. Энэ хүшэр асуудал шиидхэхэ арга бии. Хизаарай бюджедэй мүнгөөр ажаhуугшадые ондоо гэртэ оруулха, хуушарhан гэрнүүдыень худалдан абаха юм.
Һүүлээрнь «Чебурашка» хүүгэдэй сэсэрлигэй 36 үхибүүдэй яслиин шэнэ залгалаа байшанай барилга хэр ябанаб гэжэ шалгаа. Хэлсээнэй ёһоор, ноябриин 1-дэ энэ байшан тушаагдаха ёhотой аад, болзорhоо хожомдожо байна. Саашаа «Теремок» хүүгэдэй сэсэрлиг ороо, тэндэ байдалынь hайн, үшөө хүүгэдые абаха арга бии. Дулдарга hууринда хүүгэдэй табан сэсэрлиг ажалладаг, тиимэhээ ээлжээнэй асуудал гарадаггүй бшуу.
Илалтын сэсэрлиг «Комфортная городская среда» гэhэн программа бэелүүлгын жэшээ юм. Бүхы сэсэрлиг шэнээр заhабарилагдаа, плиткэнүүд болон гэрэлтүүлгэ, hандалинууд, бог шоройн амhарта, беседкэнүүд хэгдээ - энэ ажалда 10 сая түхэриг гаргашалагдаа, хажуугаарнь «Развитие сельских территорий» программаар 2 сая түхэригэй тайзан табигдаа.
Амбан захирагша Дулдаргын 2-дохи дунда hургуулида тамирай комплекс барилгын түлэблэл хараад, мүнгэ hомололгын бүхы арга боломжонуудые бэдэрэгты гэжэ даалгаа.
Дулдаргын аймагай больницын хүдэлмэрилэгшэдтэй уулзаа, энэ эмхи урьһаламжын ехэ үри шэритэй байна, тэрэнээ түргэн шиидхэхэ ёһотой гэжэ губернатор хэлээ. Байшан соохииень даамайгаар заhаха, дулаасуулгын ба hалхитуулгын системэнүүдые hэлгүүлхэ хэрэгтэй байна. Тус больницада заһабарилгын ажалнууд хэдэн программаар ябуулагдаха түсэбтэй, жэшээнь, нэгэ программын хэмжээндэ 2025 ондо поликлиникэдэ заhабарилга хэгдэхэ болоо. Аймагай больницада 72 хүнэй хэбтэжэ аргалуулхаар стационар, нэгэ мүһэн 200 хүнэй ябаха поликлиникэ, 15 хүнэй стационар, Зүдхэли, Шандали hуурингуудай эмнэлгын амбулаторинууд, 8 ФАП, түргэн туhаламжын фельдшерскэ бригада ажалладаг. Хамта 26 врачнууд хүдэлнэ, анестезиолог-реаниматолог, акушер-гинеколог, хирург, УЗИ-гэй врач, фтизиатр, невролог, инфекционист хэрэгтэй. «Земский доктор» программаар ерэһэн гурбан врачнууд хүдэлнэ, хоёрынь участково педиатрнууд ба нэгэ офтальмолог. Зургаан гэр худалдажа абтаhан, гурбан гэрынь эзэлээтэй. Губернатор больницын материально-техническэ бааза хангалгын программаар худалдажа абтаhан эмнэлгын хэрэгсэлнүүдые хараа юм.
Алхана hууринай соёлой байшан шэнэдхэхэ арга боломжонуудтай танилсаа. Тус байшанда дулаасуулгын системын ехэ заhабарилга хэхэ, хушалтыень заhаха, ниитэ барилгын ажалнуудые ябуулха хэрэгтэй. Заhабарилга байшанай нээгдэhээр хэгдээгүй бшуу. Губернатор нэн түрүүн байшанай хушалта заhаха хэрэгтэй гэжэ тэмдэглээ. Энэ заhабарилгада 7 сая түхэриг хэрэгтэй юм. «Эдэ ажалнуудта хүдөө hуурингуудые хүгжөөлгын программын ба ЦЭР-эй хэмжээндэ мүнгэ hомолхоор байна. Ерэхэ жэлдэ хушалта заhабарилгада хабаатай бүхы асуудалнуудые шиидхэхын тула оролдохо, тусхай мүнгэ гаргаха, программада орохын тула hайнаар саарһануудаа бэлдэхэ хэрэгтэй, бусад ажалнууд дээрэ саашадаа хүдэлхэбди», - гэжэ амбан захирагша тэмдэглээ. Соёлой байшан 1982 ондо баригдаhан, танхимынь 450 хүнэй hууритай, дүрбэн зохёохы мэргэжэлтэд хүдэлнэ. Тиихэдэ энэ байшан соо хизаар ороноо шэнжэлэлгын музей, hууринай захиргаан, ФАП, почто байдаг, 13 соёлой байгуулалта ажалладаг шуу.
«Алханын сууряан» гэhэн соёлой-аяншалгын түб байгуулхаар түсэблэгдэнэ. Дэбисхэр дээрэнь аймагай, тойрогой, хизаарай хэмжээ ябуулгануудые үнгэргэхэ түүхын талмай зохёохо, айлшадые угтан абаха ансамбль (сэргэ, заншалта ба мүнөөнэй hэеы гэр) түхеэрхэ, «Буряадуудта айлшалга» анимациин программа эмхидхэхэ хүсэлтэй бшуу.
«Ерэхэ гурбан жэлэй туршада ажалай һууринуудые байгуулха, hайн салин түлэхэ эрхэ нүхэсэл зохёохо хэрэгтэй. Энээниие үгэжэ шадаха шэглэлнүүдые бидэ мүнөөдэр ябажа хараабди. Эдэ бол нэн түрүүн хүдөө ажахын, аяншалгын, ажаүйлэдбэриин хүгжэлтэ юм, хүнүүдэй ажамидарха нүхэсэл зохёолго болоно», - гэжэ Александр Осипов хараһан, үзэһэнэйнгөө дүнгүүдые татаба.
Цымжидма ДОЛГОРОВА.
