Мартын 29-дэ Ага тосхоной захиргаан соо үнгэргэгдэһэн тойрогой толгойлогшонорой Зүбшэлгын Зүблэлэй суглаанда ажалай габьяа харуулһан 4 хүндэ шангууд барюулагдаа.
Хүндэтэ нэрэ зэргэнүүд Забайкалиин хизаарай Хуули байгуулгын Суглаанай 2017 оной февралиин 15-да абтаһан 38-дахи дугаар тогтоолой ёһоор олгогдоо. Тиигэжэ “Забайкалиин хизаарай габьяата бухгалтер” гэһэн нэрэ зэргэдэ Бүгэдэ буряадай “Толон” һониной редакциин ахамад бухгалтер Цыржена Дашиевна Цыбенова ба Дулдаргын аймагай Үзѳѳнэй захиргаанай ахамад мэргэжэлтэн Юмжидма Дамдинцыреновна Дондокова хүртѳѳ. Мүн хизаарай ажаһуугшадые социальна талаар хамгаалгын габьяата хүдэлмэрилэгшэ Дулдаргын аймагай ажаһуугшадые ажалаар хангалгын түбэй директор Батожаргал Гомбоевич Гончиков, хизаарай габьяата муниципальна албатан Тугшанай захиргаанай гол мэргэжэлтэн Ешинхорло Хубисхалановна Дашиева болоо.
Цыржена Цыбенова 2008 онһоо “Толон” һониной редакциин ахамад бухгалтераар ажаллана, урда тээнь олон жэлдэ Хүнхэр нютагай захиргаанда бухгалтераар, Агын тойрогоор гүрэнэй статистикын албанда экономистаар ажаллаһан намтартай. Бухгалтер гээшэмнай нягталан бодогшо, эмхи зургаанайнгаа бүхы ажахые тоонуудай хэлэн дээрэ харуулха тусгаар шадабаритай хүн. Иигэжэ редакциин бүхы үйлэ хэрэгүүдые тоонуудай хэлэн дээрэ түүхын гүн соо үлѳѳжэ, ерээдүйн түсэбүүдые тааруулан табижа байдаг суг хүдэлдэг нүхэрэйнгѳѳ амжалтаарнь баясанабди.
Дэлгэрэнгыгээр 13-дахи дугаарта.
