«Шулуутай» хүдөө һууринай захиргаанай толгойлогшо Ц.Цыбиков, зүблэлэй түрүүлэгшэ Б.Цыденешиев, Агын дасанай ехэ гэсхы, Агын Буддын шажанай академиин ректор Ч.Сультимов, бүгэдэ буряадай «Толон» газетын ахамад редактор Ц.Тумурова, Шулуутайн дунда һургуулиин директор Ж.Базаргуруев, РФ-гэй габьяата багша, багшын ажалай ветеран Б.Базаров ба бэшэн тус үзэсхэлэнэй нээлгын баяр ёһололдо хабаадажа, хани халуунаар амаршалаа. Мүн Батожаб Базаргуруевичай үетэн нүхэд, түрэл гарал, шабинарынь үреэл хэлэжэ, бэлэгүүдые баряа.
Б.Базаржапов Новосибирскын гүрэнэй багшанарай институдай уран һайханай-графическа факультет түгэсхэһэн, зурагай академическэ эрдэмтэй хүн юм. Шулуутайн дунда һургуулида зурагай ба технологиин багшаар 38-дахи жэлээ хүдэлжэ байна. Наһанай амаралтада гараад, гоё һайхан зурагуудые зуража эхилээ. Түрэл нютагайнгаа түхэл шарай харуулжа, сэдьхэлэйнгээ байдал уран биирын хүсөөр гаргажа шадаа. «Улаан хада», «Эгээ хүсэтэй дошхон долгин», «Намар», «Наран сэсэгүүд», «Хуһан түглы» г.м. зурагуудынь хүнэй анхарал эжэлүүдгүй татана. Хүгшэнэй дүрэ харуулһан түрүүшын зурагынь, модоор хэһэн уран бүтээлнүүдынь аргагүй зохид, гоё байгаа. Тиихэдэ Батожаб Базаргуруевичай талаан бэлигтэй шабинар Булат Базаров, Марина Лубсанова ба бэшэнэй уран зурагууд, алташа, мүнгэшэ дархан Светлана Ангаткинагай бүтээһэн зүүдхэлнүүдэй фото-буулгабаринууд соёлой байшанай фойе соо дэлгээгдэһэн байна.
Жалсан ЛУБСАНДАШИЕВ.
