Акциин хэмжээндэ Агын Буряадай тойрогой Захиргаанай хүтэлбэрилэгшэ Буянто Батомункуев Могойтодо ажаhуудаг 10 хүүгэдтэй бүлэдэ айлшалаа.
Бато ба Баирма Даширабдановтан 5 хүүгэдэй аба эжы, мүн тиихэдэ 5 хүүгэдые үргэжэ абаhан байна.
Буянто Балданжапович 6 наhатай Цыден хүбүүндэ поезд нааданхай, бэшэндэнь лего-конструкторнуудые, урлал хэдэг набор, мүн тиихэдэ амтан бэлэгүүдые бэлэглээ.
Буянто Батомункуев: «Номдоо hайнаар hурагты, дуратай юумээрээ hонирхогты, ерээдүй сагта мэргэжэлээ шэлэхэ болоходотнай хэрэгтэй. Танай эбтэй эетэй гэр бүлэдэ айлшалhандаа баяртайб. Хүүгэдые хүхеэжэ, Шэнэ жэлэй урма зориг гэр бүлэдэ оруулха гээшэ hайн тэмдэг. Нютагайхидтаа иимэ hайн хэрэг бүтээлсэжэ байхыень уряалнаб», - гээд тэрэ тэмдэглээ.
Даширабдановтанай гэр бүлэ 3 басагадтаа, 7 хүбүүдтэй. Ехэ басаганиинь Ново-сибирскдэ hурадаг, томо хүбүүниинь сэрэгэй албанда, Аюр хүбүүниинь Суворовско училищида hурана. Бага хүбүүнhээ бэшэниинь hургуулида hурадаг. Баирма эжынь Могойтын аймагай больницада эмнэлгын сестрагаар, гэрэй эзэн Бато Дашидондокович Могойтын аймагай Захиргаанда жолоошоноор хүдэлдэг.
Валентина ЦЫРЕНЖАПОВА.
